Македонскиот дизајнер Дејан Христов ја претстави неговата визија за поегзотичен наследник на Aston Martin DBS, која одлично би се позиционирала во гамата на Британскиот производител.
Неговото најново дело е претставено во две изведби: купе и кабрио тип на каросерија со долг преден поклопец и задно позиционирана кабина со две седишта. Името на концептот Vanteon доаѓа како еволуција на името Vantage, од кое е искористен првиот слог Vant, што значи предводник, но вториот слог Age е заменет со Eon, кој би соодветствувал повеќе на новата електрична ера.
Основната инспирација за овој концепт на Дејан биле задните светла на моделот One-77, и како би изгледало кога тие би се поставиле на спротивната страна. Потоа, истата форма била искористена и кај предните светла, сместени до препознатливата решетка.
Задните и предните светла ги поврзува една хоризонтална карактерна линија, која прави прекршување на површините и отвара простор за проток на воздух кон сопирачките. Vanteon има поизразени аеродинамички елементи во долниот дел од каросеријата, како странични крила на предниот браник, масивни прагови и огромен заден дифузер.
Може да се забележи и дека кај купе изведбата предното, панорамското и страничните стакла се поврзани, но и делумно одделени од Ц-столбот кој продолжува на краевите на кровот од двете страни во вид на рогови. Сепак, недостасува задното ветробранско стакло, па погледот кон назад би се вршел преку камери и екрани.
Според Дејан, доколку некогаш би излегол во производство, Vanteon би бил базиран на платформата на DB11, а би се нудел со мотор со внатрешно согорување и електричен погон. Се чини дека Дејан комплетно го осмислил концептот, со целосен план за негово лансирање на пазарот.
Нашето мислење е дека визијата Vanteon изгледа фантастично! Единствената работа што не ни се допаѓа кај него е дека е многу далеку од реалност, за жал.
