Неколку нови автомобили имаа шанса да докажат колку се безбедни на EuroNCAP тестовите. Видовме неколку изненадувања, додека другите автомобили рутински ги освоија 5-те ѕвезди.
Единаесет нови автомобили беа пред сериозен тест – да се освојат максималните 5 ѕвездички на тестот за безбедност но меѓу нив имаше некои резултати кои навистина не ги очекувавме.
BMW i3 EV – автомобил за кој веќе неколку пати пишувавме, најпрво како концепт а потоа и како серски автомобил – незадоволително ги помина прилично строгите услови на EuroNCAP. i3 освои прилично високи оценки за безбедноста на возрасните патници и децата, но најголем проблем за електричниот автомобил беше безбедноста на пешаците, каде освои ниски 57 %.
Уште едно разочарување беше и малиот SUV на Ford – EcoSport – кој исто така освои само 4 ѕвезди на EuroNCAP. EcoSport освои неверојатни 93% за безбедноста на возрасните патници во автомобилот, но потоа сликата ја расипа со само 77% за децата како и ниските 58% за заштита на пешаците.
Новите, построги критериуми што ги наметна EuroNCAP, особено во делот за заштита на пешаците во соoбраќајoт беа кобни и за новиот Nissan Note кој исто како и BMW i3 и Ford EcoSport извади минимални 58% во оваа категорија, а со тоа и само 4 ѕвезди.
Пред само неколку месеци на EuroNCAP тестот се појави Mercedes-Benz Citan кој тогаш освои само 3 ѕвезди. Сега значајно подобрен, Citan повторно храбро застана пред препреките на EuroNCAP. Да, помина подобро, но сепак не ги освои максималните 5 ѕвезди, туку само 4.
Нареден на сцената беше Volkswagen T5, кој исто така замина со 4 ѕвезди. Иако Т5 имаше прилично солидни резултати за безбедноста на возрасните патници и децата, разочара со најниските 32% за безбедноста на пешаците во сообраќајот.
Сепак, покрај овие автомобили имаше и неколку кои успешно ги задоволија строгите критериуми на EuroNCAP и заминаа со максималните 5 ѕвезди. Тука најпрво ќе ги сместиме Infinity Q50 и Maserati Ghibli – автомобилите кои покажаа дека безбедноста не е луксуз. Maserati Ghibli кој неодамна ги помина тестирањата на IIHS каде беше именуван за најбезбедниот автомобил, сега успешно се закити и со максималните 5 ѕвезди на EuroNCAP.
Успешен ден имаше и новото Peugeot 308 кое неодамна имавме прилика и да го повозиме (и мора да признаеме дека не воодушеви) и кое ги освои максималните 5 ѕвезди на EuroNCAP. Прилично самоуверено и новата Mazda 3 лесно ги помина тестирањата и со прилично високи резултати ги освои 5-те ѕвезди.
SUV-от на Mitsubushi, новиот Outlander исто така очекувано освои 5 максимални ѕвезди на EuroNCAP, а кон листата на тие кои освоија 5 ѕвездички се приклучи и Ford Tourneo.
Во продолжение ќе видите видео за Maserati Ghibli кое имаше неверојатно високи резултати на тестирањата, како неколку фотографии од останатите учесници.