Надзорниот одбор на германскиот гигант одобри план за сеопфатно реструктурирање – а планот вклучува потенцијално затворање на фабрики и значително намалување на работната сила во Германија.
Планот кој се вика Future Plan 2030 е „стратешки најзначајната трансформација во историјата на Volkswagen Group“. Океј, но што всушност значи тоа?
Накратко, планот вклучува затворање на фабрики, но и намалување на работните места. Според планот, Volkswagen ќе се концентрира само на „најважните и најубедливите возила“ и до 2035 околу половина од сегашните модели ќе бидат пензионирани. Дополнително, комплексноста ќе биде намалена за околу 75%, што всушност значи дека понудата ќе биде поедноставена и ќе се нудат помалку различни конфигурации. Според Volkswagen, ова ќе значи зголемена продажба, намалени трошоци и подобрена економија на размер. Додаваат и дека „системски ќе ги прилагодат платформите, електричните архитектури, системите за асистенција и софтверот за потребите на западната и источната хемисфера“.
Истовремено, Volkswagen потврди дека европските производствени капацитети се предимензионирани за моменталните потреби, и тоа за околу 500.000 возила годишно. Соодветно на тоа, ќе треба да бидат направени соодветни прилагодувања и Volkswagen сака до Јуни следната година да има конкретен план околу оваа реалност. Малку загрижувачки, кажуваат дека „компетитивната идна алокација за производство во Емден, Цвикау, Хановер и Некарсулм не може да биде обезбедено на скалеста основа од 2031 до 2034“. Интересно е што не најавуваат директно затворање на фабриките и напоменуваат дека „во моментов се разгледува алтернативна намена за овие фабрики“.
Од друга страна, планот индиректно најавува кратење на околу 50.000 работни места во Германија, вклучувајќи и менаџерски позиции. Истовремено, Volkswagen детално ги разгледува и другите бизниси кои се дел од групацијата и дури размислува и да продаде дел од своето портфолио на недвижности.
Главниот извршен директор на Volkswagen Group, Oliver Blume изјави дека „Надзорниот Одбор едногласно го одобри планот на извршниот одбор кој беше претставен денес. Ова е силен сигнал за иднината на Volkswagen Group. Ја преземаме одговорноста за сите наши вработени, за нашите партнери и за индустриските работни места ширум светот. Во следните неколку години ќе инвестираме троцифрена бројка на милијарди за да ги направиме нашите брендови уште попривлечни, посилни и поконкурентни“.
