Кинескиот бренд станува сè посилен во Европа. Всушност, овој Август беше одличен за BYD кој освои дури 2.5% од пазарот во Германија!
Минатиот месец беше одличен за BYD во Германија. Со 5262 ново-регистрирани возила, BYD успеа да освои 2.5% од тамошниот пазар. Водечки модел е плаг-ин хибридниот BYD SEAL U DM-i кој се продаде во вкупно 1283 примероци за само еден месец.
Од BYD Германија кажуваат дека ова е директен резултат на активностите и развојот низ изминатите неколку месеци – раст кој не е врзан со некакви специјални активности, туку на конзистентна пазарна стратегија. Всушност, Lars Bialkowski кој е одговорен за BYD во Германија изјави дека „Во Германија целиме кон пазарна стратегија која е дизајнирана за конзистентност. Август покажа дека ваквиот пристап вродува со плод, без разлика на периодот во годината. Ова е бидејќи побарувачката и присуството на пазарот растат паралелно.“
Ние би рекле дека сето ова е интересен индикатор за пазарните промени. Скептичноста која (како низ Европа, така и кај нас) постоеше за кинеските брендови полека но сигурно се надминува и купувачите ја препознаваат вредноста на автомобилите кои доаѓаат од далечниот исток. Истовремено, кинеските брендови веќе инвестираат во европска логистичка инфраструктура, но и погони каде локално ќе се произведуваат нивните автомобили.
