full screen background image
Search

ПРЕМИЕРА: BMW 128ti е баварски рецепт за хот хеч со погон на предните тркала

Баварците сега имаат свој натпреварувач во „цивилната“ хот хеч класа – а тоа е токму BMW 128ti со 265 коњски сили!

Новиот 128ti не само што е нешто ново во понудата на BMW, туку и ја воскреснува ti ознаката која всушност значи Turismo Internazionale и е ознака која 20-тина години ја нема на пазарот. „На времето“ ја користеа 1800 TI, 2002 TI и кон крајот на 90-тите години ја користеа и 323ti и 325ti Compact.

Но што се крие под кожата? Инженерите на BMW го земале 2-литарскиот турбо бензинец од M135i и малку му ја намалиле моќноста – од 306 на 265 коњски сили, но истовремено изваден е xDrive погонот на сите четири тркала и суспензијата е преработена за новата геометрија на автомобилот.

Силата – тие 265 коњски сили, но и 400 Nm вртежен момент – се пренесува кон предните тркала преку 8-брзински автоматски менувач и Torsen диференцијал со ограничено пролизгување, а резултат на сето тоа е спринт до 100 километри на час за 6.1 секунда и максимални 250 километри на час.

Вреди да се напомене дека 128ti е полесен од M135i за цели 80 килограми – а тоа резултира со уште попрецизна управливост. Добива и поцврсти стабилизатори, пониска суспензија, поцврсти амортизери и пружини, M Sport сопирачки со црвени шепи.. Приказната завршува со 18-инчни тркала обвиени во Michelin Pilot Sport 4 пневматици.

Екстериерот добива и специјален Shadowline пакет со црни детали, уникатни странични прагови, како и неизбежните ti значки. Кабината добива црвени детали, контрастни опшивки, спортски седишта и спортски управувач.

Поврзано:   Manhart MHX6 е тука за да го привлече вниманието на сите

Продажбата на BMW 128ti ќе започне во Ноември. Ние веќе го возевме BMW M135i на неговото официјално претставување во Минхен, минатата година.



Алфа и Омега на CARclub. Играчките остануваат, само стануваат поскапи.