Германскиот бренд го претстави новиот кросовер T-Roc пред неколку седмици, а сега компанијата ја збогатува неговата гама со R-Line пакет.
Дизајниран за купувачите кои сакаат да бидат повпечатливи, R-Line пакетот содржи поспортски браници во боја на каросеријата и R-Line ознака на решетката. Тука се и нов уникатен заден дифузер, пластики на вратите во боја на каросеријата и затемнети задни светла.
За да ја разигра кабината, R-Line пакетот додава кожен волан и двобојни платнени/микрофибер седишта со детали од вештачка кожа. Пакетот исто така содржи црн тапацир на кровот, специјални патосници и педали од не’рѓосувачки челик. Измените завршуваат со R-Line ознаки на праговите од вратите и 18 или 19-инчни алуминиумски тркала.
Покрај претставувањето на R-Line изведбата, Volkswagen ги откри деталите за гамата на T-Roc. Основен бензински агрегат ќе биде 1.0-литарскиот TSI кој развива 115 кс и 200 Nm вртежен момент. Едно скалило погоре ќе биде 1.5-литарскиот TSI со 150 кс и 250 Nm вртежен момент. На крај, тука ќе биде и 2.0-литарски TSI агрегат кој испорачува 190 кс и 320 Nm.
Љубителите на дизел мотори ќе можат да нарачаат 1.6-литарски TDI со 115 кс и 250 Nm вртежен момент. Исто така тука ќе биде и 2.0-литарски TDI агрегат во една верзија со 150 кс и 340 Nm, како и друга верзија со 190 кс и 400 Nm вртежен момент.
Во зависност од тоа која погонска единица ќе биде одбрана, тој може да се добие со шест-степена мануелна трансмисија или седум-степен DSG менувач. Основните агрегати доаѓаат единствено со погон на предните тркала, додека погонот на сите четири ќе биде понуден како опција или доаѓа сериски кај посилните модели.
