Секогаш кога треба да напишеме нешто за Aston Martin имаме насмевка од уво до уво!
Aston Martin го најави освежениот V8 Vantage со зборовите дека ова е најдлабока промена на моделот од 2008-ма година па наваму. За среќа, визуелните промени се ситни, бидејќи стварно нема потреба да се ризикува со прекрасниот дизајн.
Освежувањето започнува со новиот автоматски менувач со 7 брзини кој го заменува досегашниот со 6, додека рачниот менувач сеуште останува во понудата. Основната верзија ќе добие и побрзо и попрецизно управување, како и поголеми дискови за кочниците. Надворешноста е освежена со детали од N400 моделот, како што е нов преден браник, поизразени странични прагови и заден браник со дифузер.
Моторите остануваат исти – основниот 4.2-литарски V8 мотор може да се пофали со 420 коњски сили, а се нудат и Vantage S со 4.7 литарски V8 и 430 коњски сили, но и V12 Vantage со V12 мотор и 510 коњски сили. Секако, на врвот на моделската понуда е V12 Zagato кој ќе се нуди во лимитирана серија од само 150 парчиња.
