Вчера Volvo во Шведска го претстави долго очекуваниот S60 Polestar Performance Concept, замислен како конкурент на BMW M3.
Првата работа која што треба да ја знаеме за овој модел е дека тој е уникат, создаден од автомобилската компанија Volvo и нејзиниот тркачки и тјунинг партнер Polestar, за анонимен клиент. Сепак, доколку реакциите на јавноста бидат позитивни, можно е негово производство во ограничена серија од неколку примероци.
S60 Polestar го придвижува 3.0-литарски, бензински мотор со шест цилиндри во линија и турбополнач, засилен на 508 КС и 575 Nm вртежен момент. Моторот е усогласен со шест-степен мануелен менувач, како и погон на сите тркала. Забрзувањето од место до 100 км/ч изнесува импресивни 3.9 секунди, додека неговата максимална брзина е над 300 км/ч!
Однадвор, неговата каросерија е проширена за 20 милиметри напред и 40 милиметри назад. Тој сега располага со нов стајлинг пакет, кој содржи проширени крила, нов преден браник, странични прагови, дискретен спојлер над багажникот и нов заден браник со дифузер. Стандардните тркала се заменети со 19-инчни алуминиумски бандажи обвиени во гуми во профил 265/30 R19.
Ентериерот располага со спортски седишта дизајнирани од Polestar, Алкантара на сите функционални места како воланот, рачката од менувачот и седиштата, плус пониска централна конзола за подобра и поспортска ергономија.
