По повод 75 годишниот јубилеј од започнувањето со продажба на возила на Јужно-Африканскиот пазар, Volkswagen Motorsport ќе лансира специјална изведба наменета за учество на ридско брзинските тркачки натпревари.
Кога ќе се спојат практичноста на Volkswagen Golf, легендарниот пет-цилиндарски мотор на Audi RS3 и екстремен аеродинамичен пакет, резултатот е автомобил кој изгледа како да избегал директно од DTM шампионатот. Токму таков е овој уникатен Golf, создаден специјално за настап во Јужно-Африканскиот национален ридски шампионат.
Проектот е далеку од обична тјунинг преработка. Под поклопецот се наоѓа унапредена верзија на добро познатиот 2,5-литарски турбо петцилиндарец од Audi – мотор кој важи за еден од најхаризматичните во современата автомобилска индустрија, засилен да испорачува над 1,000 коњски сили.
За да може целосно да ја искористи дополнителната сила, автомобилот добил целосно нов аеродинамичен пакет. Масивниот преден сплитер, проширените крила, огромното задно крило и агресивниот дифузер не се тука само за изглед – нивната задача е да обезбедат максимален потисок и стабилност на техничките и брзи делници од ридските патеки.
Во внатрешноста нема простор за компромиси. Кабината е целосно прилагодена за натпреварување со заштитен кафез, тркачко седиште и сите неопходни безбедносни компоненти, додека секој непотребен елемент е отстранет со цел намалување на тежината.
Интересно е што овој проект пристигнува во период кога сè погласни се шпекулациите дека Volkswagen размислува за сериски Golf R со истиот 2.5 TFSI мотор од Audi RS3, кој би испорачувал повеќе од 400 КС. Засега нема официјална потврда, но ваквиот тркачки автомобил покажува колкав потенцијал има оваа комбинација.
Без разлика дали некогаш ќе видиме ваква конфигурација во сериско производство, едно е сигурно – ова е еден од најекстремните Golf модели создадени во последно време и совршен пример како легендарниот хечбек може да се претвори во вистинска тркачка машина.
