Новиот Golf R Variant го добива истиот погон како и хечбекот – а тоа значи 320 коњски сили и Drift Mode!
Исто како и „обичниот“ Volkswagen Golf R, и Golf R Variant го добива истиот 2-литарски турбо-бензинец кој испорачува 320 коњски сили и 420 Nm вртежен момент. Силата преку DSG менувач со двојна спојка се пренесува кон сите четири тркала, а ако го нарачате и R Performance Package пакетот ќе добиете и повисока максимална брзина, како и Nurburgring и Drift режимите на возење! Но и да не го нарачате, Golf R Variant ќе катапултира до 100 километри на час за 4.9 секунди и ќе достигне 250 километри на час, односно 270 километри на час со R Performance.
Со исправени задни седишта, караванот нуди одлични 611 литри во багажникот, а кога ќе ги преклопите ќе добиете одлични 1642 литри капацитет. Бидејќи Golf R Variant е 79 килограми потежок од стандардниот хечбек, инженерите на Volkswagen поработеле на суспензијата. Интересна е и бројката за влечење – Golf R Variant може да влече импресивни 1900 килограми!
Секако, тука се и сите оние спортски детали кои веќе се добиваат кај Golf R – одличните спортски седишта, поагресивните браници, големите тркала и големите сопирачки. Кабината добива и специјални R инструменти, а достапни се и специјални R бои за екстериерот.
Новиот спортски караван на Volkswagen веќе може да се нарача!
