full screen background image
Search

Репортажа: Со целата гама на Porsche кон винскиот регион на Македонија!

Имавме супер можност и оваа година да бидеме дел од македонскиот Porsche Experience, кој овој пат не однесе директно во винскиот регион на Македонија и винаријата Тиквеш во Кавадарци.

Знаете дека денот ќе биде добар кога на располагање имате неколку различни автомобили на Porsche од кои „најслабиот“ има 365 коњски сили и забрзува до 100 километри на час за 4.6 секунди.

Porsche Experience е повторно кај нас, а ние имавме одлична можност да поминеме еден ден во друштво на скоро целата гама на германскиот производител. Да започнеме со набројување:

Шест одлични автомобили, и скоро 3000 коњски сили. Одличен рецепт за одличен ден, нели?

Нашето патување започна пред салонот на Porsche во Скопје. Изложените автомобили веднаш го привлекуваат внимането – особено малиот Cayman GTS во прекрасната Miami Blue боја и прекрасниот 911 Carrera S во Racing Yellow. Ова се двата автомобили кои едноставно „врескаат“ со своето присуство – а не се најбрзите кои ги имаме на располагање. По краткото претставување на нашите домаќини и распоредот на возење, групата е веќе подготвена за тргнување.

Прво седнувам зад управувачот на Cayman GTS. Ова не е мојот прв контакт со GTS-изведбата на најмалиот член на Porsche семејството – имав можност да го повозам на Silesiaring тркачката патека во Полска за време на овогодинешната прослава на 70 Години Porsche Спортски Автомобили. Сепак, ова е одлична можност да се провери како малиот Cayman GTS функционира по обичните улици – и верувајте, лесно е човек да се заљуби во него. Cayman е баш како картинг-возило – динамичен, директен, управлив и непокорливо забавен. Префрлам во Sport режим – издувниот систем се буди, суспензијата станува цврста и Cayman верно ги следни сите можни насоки.

Од Cayman GTS се префрлам во Cayenne S. Големиот германски SUV успешно ги крие како големината, така и тежината. Истите заклучоци од првото возење на Cayenne S на Крит минатата година повторно се наметнуваат – возењето во Cayenne воопшто не е како возење во SUV – да, големината и тежината се тука, но повеќе е како во (голем) хот хеч. Но од друга страна, Cayenne едноставно ги покорува македонските автопатишта – без никаков приговор ниту забелешка. Комфорниот хај-тек ентериер е одлично место да се поминуваат стотици и илјадници километри, па Cayenne S е интересна промена по манијакалниот Cayman GTS.

Поврзано:   Porsche го прави Cayenne уште пософистициран со Cayenne Platinum Edition

Трет „на распоред“ е Macan Turbo Performance. Ако Cayenne S е како голем хот хеч, Macan е како вистински хот хеч – само на малку повисока суспензија. Префрлете го Macan во Sport режим на работа и сите тие 440 коњски сили се веднаш достапни, а помалиот SUV во гамата на Porsche е вистинско изненадување – ова не е SUV, ова е спортски автомобил. Тој верно ќе ги следи сите инструкции кои ќе му ги дадете и ќе се насочи токму онаму каде ќе го насочите – и верувајте, нема во ниту еден момент да ве разочара.

Пристигнуваме во винаријата на Тиквеш. Мирисот на вино преовладува, а нашите домаќини нè прошетаа низ винските простории. Оправдано, немавме можност да пробаме од виното, но беше повеќе од интересно да се види процесот на производство и да се погледне просторијата со Архивско Вино, каде винаријата чува по неколку шишиња од секое производство. Зборувавме малку за правилниот начин за чување вино – нешто што беше навистина интересно.

По кратката тура низ винаријата и одличниот ручек, време беше да се враќаме кон Скопје. Зад управувачот на 911 Carrera S сум „на свое“. Иако ова е втората-најслаба изведба на Porsche 911, перформансите не се за занемарување – турбо-боксерот со шест цилиндри испорачува одлични 420 коњски сили и 500 Nm вртежен момент – сосем доволно за „стотка“ за 4.1 секунда и максимални 306 километри на час.

Повторно и повторно, Porsche 911 ме импресионира со својата прецизност и врвна динамичност. Ова е автомобил кој би можел да го возам секој ден – и секој ден би уживал во него.

Поврзано:   По 45-ти пат доделени наградите Златен Волан кои ги доделуваат Auto Bild и Bild am Sonntag

На самиот крај, ја искористив можноста да поминам малку време на задното седиште во Panamera Sport Turismo. Најмоќната изведба на Panamera ја носи ознаката Turbo S E-Hybrid, и тука хибридниот погон испорачува вкупно 680 коњски сили. Целата оваа моќ му овозможува на хибридниот караван да забрза до 100 километри на час за само 3.4 секунди, а истовремено може да вози до 120 километри на час на електрична енергија.

Зошто задните седишта? Затоа што луксузот е неизбежен – па комфорните задни седишта се „дополнети“ со мултимедијални уреди и многу, многу, многу играчки. Одличен избор за овој ден да се заврши на опуштен, мирен начин.

Групата се приближува кон Скопје и моето време со автомобилите на Porsche завршува. Ова беше одличен, забавен и исполнет ден – и секогаш е така кога поминувам време со автомобилите на Porsche. Историјата и традицијата, преплетени со перформансите и звукот предизвикуваат зависност – и иако денот е готов, не сакам никогаш да заврши.

Фотографии



Алфа и Омега на CARclub. Играчките остануваат, само стануваат поскапи.