Со специјалниот M3 30 Years American Edition, BMW го прославува јубилејот од 30 години на легендарниот модел на американскиот пазар.
Уникатниот примерок (не, не го возела баба) од BMW M3 е дизајниран од BMW Group Designworks, а за неговата изработка беа задолжени експертите од BMW Individual. Бидејќи се работи за славенички модел, овој M3 добива многу специјални детали кои го одбележуваат јубилејот.
„Основата“ е BMW Competition Package, но носи специјална Frozen Red II Metallic боја. Додаток се и уникатни M Performance тркала во златна боја, како и детали во црвена, бела и сина боја, како и карбонски кров. Дополнително, автомобилот добива и M Performance спортска суспензија, карбонски заден спојлер, лесен M Performance издув со титаниумски завршетоци, а ентериерот добива површини во црвена, бела и сина боја покриени со Мерино кожа, уникатни графички елементи на наслоните за глава и неколку други места, а многу од површините се покриени со Алкантара и карбон.
За придвижување на овој уникатен M3 е задолжен твин-турбо 3-литарски шест-цилиндерски мотор кој испорачува 444 коњски сили. Преносот е кон задните тркала преку (скоро неверојатно) мануелен менувач со шест брзини. Автомобилот ќе биде продаден на аукција на крајот на SEMA.
