full screen background image
Search

PSA ќе започне да ги менува моторите на Opel со свои

Во изјава за Automobilwoche, Gilles Le Borgne од PSA изјави дека постепено ќе започнат да се користат платформи и мотори од PSA за моделите на Opel.

Овој потег не е воопшто изненадувачки – веќе е најавено дека следната Corsa ќе ја дели платформата со следната генерација Peugeot 208 и Citroen C3. Сепак, ова се веќе конкретни најави – одговорниот за развој во PSA – Gilles Le Borgne изјави дека постепено ќе започнат да се користат PSA платформи и мотори за моделите на Opel. Секако, ова нема да се случи „од денес за утре“ – и од PSA веќе објаснија дека процесот ќе трае неколку години – всушност, како што автомобилите ќе бидат заменувани со нови.

Според Le Borgne „сите мотори на PSA ги исполнуваат сите легални услови на сите пазари каде работиме, и ќе се обидеме да бидеме сигурни дека ист е случајот и со моторите на Opel.” Сега за сега ништо не е одлучено, но јасно е дека кај Opel мораат да бидат постигнати значителни подобрувања во ефикасноста. Le Borgne додаде дека „Opel ќе ги искористи искуствата од нашето реструктурирање и очекуваме синергија со секоја замена на модел.“

Дополнително, PSA сака да ги намали плаќањата кои ги прави кон GM во однос на права на користење и патенти на технологии. „Сакаме да ги елиминираме овие трошоци колку е можно побрзо“ – и токму тука се крие можеби најважниот аргумент дека PSA наскоро ќе ги замени платформите и моторите на Opel (барем оние кои потекнуваат од GM) со сопствени.

Поврзано:   Радикалниот Peugeot 508 пристигна и на македонските патишта

Според Peter Fintl од Altran (француски провајдер на развојни услуги кој соработува со PSA) работите се јасни – „на PSA не му требаат конвенционалните технологии на Opel. Бидејќи обата производители се активни во истите класи, сосем е извесно дека платформите на Opel постепно ќе бидат пензионирани и заменети со технологии од PSA.“ Сепак, Fintl додаде дека „ќе биде интересно да се види како PSA и GM ќе се договорат околу користењето на електричните технологии од GM и познавањето околу горивните ќелии.“

Истовремено, во игра е и развојниот центар на Opel посветен токму на моторите, лоциран во Риселхајм. Во тој центар Opel инвестираше 210 милиони евра и во моментов таму работат околу 800 вработени. Иднината на овој центар е неизвесна, а кога беше запрашан за неговата иднина, претседателот на PSA – Carlos Tavares – рече дека одлуката не е негова: „Ако владите одлучат да ги забранат моторите со внатрешно согорување, моја задача како претседател на компанијата е да ги почитувам регулативите.“



Алфа и Омега на CARclub. Играчките остануваат, само стануваат поскапи.