full screen background image
Search

Следниот Volkswagen Golf GTI ќе има хибриден погон?

Започнуваат да се шират гласини дека следната генерација на легендарниот Golf GTI ќе користи хибриден погон за да има подобри перформанси – во истиот дух како McLaren P1, Ferrari LaFerrari и Porsche 918!

Дали следната генерација на Golf GTI ќе користи хибриден погон за да има подобри перформанси и подобра економичност? Почнуваат да се јавуваат гласини кои го тврдат токму тоа, а таквите шпекулации потекнуваат од нашите колеги од Autocar.

Тие сугерираат дека следниот, 8-ми по ред Golf GTI ќе користи (исто како и досега) 2-литарски турбо-бензинец со четири цилиндри, но поврзан на 48-волтен систем со интегриран стартер мотор. Дополнително, се шпекулира дека оваа промена е со цел да се замени традиционалниот турбополнач со електричен турбополнач. Со ова целосно би се елиминирала турбо-дупката и би се добил уште подостапен вртежен момент. Дополнително, сугерираат дека стартер-моторот ќе се користи како дополнителен засилувач до одредени режими на работа. Се најавуваат околу 260 коњски сили.

Секако, и следниот Golf GTI ќе биде базиран на MQB платформата на Volkswagen, но со зголемено меѓуоскино растојание и дополнително намалена тежина – користењето на лесни материјали би требало да значи намалување на тежината за околу 50-тина килограми.

Сето ова звучи многу интересно – бидејќи е интересно да се види како технологиите и филозофијата која во моментов ја користат врвните хипер-автомобили може да се интерпретира и да се примени кај „цивилен“ автомобил. Останува да бидеме трпеливи и да причекаме до 2020, кога е најавено дебито на новиот Golf GTI.

 



Алфа и Омега на CARclub. Играчките остануваат, само стануваат поскапи.