Пред да нè прашате кои се David Brown Automotive – ќе ви одговориме дека ни ние не знаеме – но го најавуваат својот прв модел, кој ќе биде базиран на Jaguar XKR!
Автомобилот, за кој знаеме дека го носи шифрираното име Project Judy ќе биде базиран врз одличниот Jaguar XKR. Компанијата најавува дека автомобилот ќе има целосно нов дизајн и нов карактер – но нам предниот дел навистина ни наликува на прекрасниот Aston Martin DB5.
Но сепак, да ги оставиме предрасудите и претпоставките настрана – она што веќе го знаеме е дека автомобилот на David Brown Automotive ќе биде придвижуван од 5-литарски, компресорски V8 кој ќе испорачува 510 коњски сили и 625 Nm вртежен момент. Силата ќе се пренесува кон тркалата преку шест-степен автоматски менувач, а автомобилот ќе може да забрза до 100 километри на час за 4.6 секунди, додека максималната брзина ќе изнесува повеќе од 250 километри на час.
Според основачот на компанијата – David Brown – изборот бил прилично лесен. Доверливата и докажана платформа на Jaguar XK била логичниот избор благодарение на изработката од алуминиум, но и динамичните перформанси кои ги нуди. Повеќе информации за автомобилот на David Brown Automotive ќе имаме кога тој ќе ја има својата премиера, на 17ти Април на Top Marques Monaco.
