Французинот Stephane Peterhansel ја освои својата рекордна, петта победа на Dakar во категоријата на автомобили а на неговиот сонародник Cyril Despres му припадна победата кај моторциклите!
Peterhansel извојува победи во 2004, 2005, 2007 и во 2012, но има и шест титули во категоријата на моторцикли. Тој годинава по собори рекордот на легендарниот Ari Vatanen кој имаше четири победи во категоријата на автомобили.
Видно задоволен од својот резултат, тој изјави дека неговото Mini е најдобриот автомобил со кој возел, и дека ова е прв пат да започне и да заврши трка без ниеден механички проблем. Секако, победата за Peterhansel беше многу подостапна откако неговите главни конкуренти – Carlos Sainz и Nasser Al-Attiyah беа приморани да се повлечат. Ова беше 25-ти настап на Dakar за Peterhansel, кој победи со разлика од 42:22 пред Giniel De Villiers кој возеше Toyota. На третото место се најде Русинот Leonid Novitskiy, кој исто така е член на Mini-тимот.
Cyril Despres исто така се радува на петта победа, овој пат со KTM. Тој победи и во 2005, 2007, 2010 и 2012. Зад него се најдоа Ruben Faria кој закасни 10:43 а трет беше Francisco Lopez. Како и другите, и Despres истакна дека овогодинешниот Dakar бил тежок, но и дека оној момент кога ќе стане лесен, ќе престане да биде интересен.
Во категоријата на камиони, доминацијата на Kamaz беше незапирлива. На крајот, на врвот на подиумот се најде Eduard Nikolayev, а неговите тимски колеги Airat Mardeyev и Andrei Karginov ги зафатија останатите две места. Ова е 11-та титула за тимот на Kamaz, но прва победа за Nikolayev.
Мораме да напоменеме дека најтешкото рели во светот, и годинава го зема својот вообичаен „данок“. Неколкуте загинати само ги потсетија возачите, но и гледачите дека Dakar е немилосрден и дека подготовките се само дел од целото искуство.
