full screen background image
Search

Премиера: 2013 Toyota Auris

Ова се првите официјални фотографии од новиот компакт 2013 Toyota Auris, кој ќе се натпреварува во класата на Volkswagen Golf и Seat Leon.

Новиот Auris ќе ја направи неговата светска премиера на претстојниот Автомобилски Саем во Париз при крајот на Септември, во бензинска, дизел и хибридна верзија. Втората генерација на Auris е тотално различна од нејзиниот претходник, моделот располага со поагресивен и посвојствен дизајн, кој го превзема новото лице на брендот, претходно видено на новите модели на Prius и Yaris.

Според Јапонскиот бренд, 2013 Auris со височина од 1460mm е најнизок од сите модели во C-сегментот. Неговата височина е намалена за 55mm во однос на досегашниот  модел, а резултат на тоа е зголемената аеродинамика и помал коефициент на отпор од само 0.28.

Новиот Auris вози на модифицирана верзија од платформата на претходниот модел, па затоа меѓуоскиното растојание од 2,600mm и ширината од 1,760mm остануваат непроменети, но направена е промена во должината, така што е зголемена за 30mm и сега изнесува 4,275mm.

Внатрешноста на автомобилот е направена од високо квалитетни материјали, а најмногу време е посветено на осветлувањето, боите и завршната обработка. Поради новите димензии, подобрена е возачката позиција, има за 20mm повеќе место на задната клупа и зголемена е должината на багажниот простор за 90mm, па сега неговиот капацитет изнесува 350 литри. Auris Hybrid и стандардниот модел ќе имаат еднаков багажен простор, бидејќи батеријата во хибридниот модел ќе биде сместена под задните седишта.

Каросеријата на новиот Auris е за 40 килограми полесна и за 10 проценти поцврста од онаа на претходниот модел. Ова е постигнато со употреба на поцврст челик во нејзината структура, особено во горниот дел.

Европскиот модел, кој ќе се произведува во фабриката на Toyota во Велика Британија, на почетокот ќе се нуди со 1.4-литарски турбо дизел, како и 1.33 и 1.6-литарски бензински агрегати. Се очекува подоцна во гамата на мотори да биде додаден и дизел агрегат со потекло од BMW.

Поврзано:   Македонска премиера на bZ4X - првата целосно-електрична Toyota!

Новиот Auris Hybrid ќе користи доразвиена верзија на сегашниот хибриден систем, кој се состои од 1.8-литарски бензински агрегат во комбинација со електричен мотор со никел-метал хибридни батерии.

Toyota изјави дека деталите, спецификациите и цените ќе бидат објавени неколку дена подоцна.



Отсекогаш Филип се интересирал за дизајнот и перформансите на автомобилите, а во срце му лежат легендарните спортски модели со забавен карактер кои можат да ги совладаат свиоците со огромна брзина.