И Fiat групацијата подготвена за Женева – CARclub.mk | #1 за Автомобилите full screen background image
Search

И Fiat групацијата подготвена за Женева

Како што се доближува стартот на авто-салонот во Женева, гледаме дека сите производители се подготвуваат за големиот настан – а секако, големо присуство ќе имаат и Fiat, Lancia, Alfa Romeo и Abarth!

Fiat има навистина многу да покаже оваа година. Во прв план се секако новата Panda и Fiat 500L, но целата групација ќе има што да покаже.

Покрај Panda и 500L, и другите брендови од групацијата ќе имаат што да покажат. Lancia ќе ја покаже новата Flavia, која е кабриолет со четири седишта и треба да понуди интересна алтернатива за конкуренцијата. Познавачите веднаш ќе приметат дека тоа е всушност Chrysler 200 Convertible адаптирана за Европскиот пазар, но бидејќи знаеме дека Chrysler 200 веќе се докажа на Американскиот пазар, тоа воопшто не е критика.

Слична е приказната и со Fiat Freemont – овој модел веќе го познаваме како Dodge Journey, уште еден успешен модел од Американскиот континент кој е адаптиран за пребирливиот Европски купувач. Големото повеќенаменско возило е одличен додаток на гамата на Fiat, но и своевиден наследник на легендаранта Multipla. Интересно е што во Женева, Fiat ќе го претстави и 500 America, лимитирана верзија на 500 со примеси на Американа.

Покрај неколкуте верзии на 500 Abarth за кои веќе пишувавме, своето деби ќе го доживее и Abarth 695 Tributo Maserati – отворена верзија на 500 Abarth посветена токму на Maserati. Бидејќи и Maserati ќе презентира свој модел во Женева, ова е одличен начин да се покажат фамилијарните врски помеѓу брендовите.

Fiat очигледно е навистина подготвен за Женева, но судејќи по досегашните најави, подготвена е и конкуренцијата – ова ќе биде интересна пролет!



Алфа и Омега на CARclub. Играчките остануваат, само стануваат поскапи.