Најновата, петта генерација на германската луксузна лимузина пристигна во салонот на Audi во Скопје.
Најновата генерација на германската луксузна лимузина со себе носи многу новитети и нови технологии – всушност, најдобар начин да ја опишеме новиот A6 на Audi е како „помалa“ А8-ка.
Меѓу другото, можете да ги добиете сите автономни технологии, но и најновите мотори кои Audi ги нуди. На самиот почеток можете да добиете Audi A6 50 TDI кој носи 3-литарски турбодизел кој испорачува 286 коњски сили и 620 Nm вртежен момент, и Audi A6 55 TFSI кој носи 3-литарски TFSI турбо-бензинец кој испорачува 340 коњски сили и 500 Nm вртежен момент. Овие мотори се комбинираат со S-Tronic автоматски менувач со двојна спојка и Quattro погон на сите четири тркала.
Пред возачот е поставен познатиот Audi Virtual Cockpit дигитален дисплеј од 12.3-инчи, а централната конзола ја сочинуваат два дисплеи – едниот со димензии од 8 или 10.1 инчи и вториот со димензии од 8.6 инчи преку кој се контролира клима-уредот и уште некои функционалности во кабината.
Како што ни кажуваат од Audi, сите модели ќе се добиваат со LED предни светла, а по нарачка ќе може да се добијат Matrix LED или Laser предни светлосни групи. Листата на дополнителна опрема кај германскиот премиум бренд е скоро бесконечна, па доколку сте заинтересирани ви препорачуваме да го посетите салонот на Audi. За оние кои сакаат поспортска изведба, тука е неизбежната S-Line варијанта, а понатаму ќе бидат понудени и S6 и RS6 изведби со многу, многу коњски сили.