Современите автомобили никогаш не биле побезбедни, но секоја нова технологија носи и своја цена – особено кога ќе дојде време за поправка. Најновото истражување на Allianz Center for Technology (AZT) покажува дека токму предните светла стануваат еден од најскапите елементи за замена кај модерните автомобили.
Според анализата, просечната цена на еден фар во Германија пораснала од 708 евра во 2015 година на дури 1.251 евро во 2025 година – раст од 77 проценти за само една деценија. Главната причина е преминот од халогени кон LED, Matrix LED и ласерски светла, но и начинот на кој производителите ги интегрираат овие системи во каросеријата и електрониката на возилото.
Она што дополнително ја зголемува сметката е фактот што кај многу модели и најмало оштетување значи замена на целиот склоп. Наместо да се заменат само оштетената леќа, куќиштето или електронскиот модул, во многу случаи се нарачува комплетно нов фар.
Според Allianz, во Германија секоја година се оштетуваат околу 870.000 автомобилски светла. Сепак, во моментов официјално е дозволена само поправка на носачите на фаровите, додека останатите компоненти најчесто не можат да се сервисираат, иако технички тоа е возможно. Според проценките, само со поправка наместо замена кај околу 10 проценти од случаите би можеле да се заштедат околу 104 милиони евра годишно и да се намалат емисиите на CO₂ за околу 4.000 тони.
Истражувачите сметаат дека производителите треба да понудат повеќе модуларни решенија. Замена само на куќиштето, електрониката или заштитната леќа би била значително поевтина од купување целосно нов фар, а во одредени случаи поправката може да биде и до 80 проценти поевтина.
Ова не е изолиран проблем. Претходни анализи покажаа дека и најобичен удар во предниот дел на автомобилот денес лесно може да резултира со сметки од неколку илјади евра, бидејќи покрај светлата често се заменуваат и браници, радари, камери и сензори за асистентските системи. Кај некои модели, само еден современ Matrix или ласерски фар чини неколку илјади евра, а вкупната поправка може да достигне и повеќе од 7.000 евра.
Како што автомобилите стануваат сè потехнолошки напредни, така растат и трошоците за нивно одржување. Прашањето повеќе не е само колку чини новата технологија при купување, туку и колку ќе чини кога ќе дојде време за нејзина поправка.
