Kia одлучи втората генерација на Seltos да ја понуди и во Европа, а тоа значи дека новиот SUV на брендот сега е достапен и во Македонија.
Во хиерархијата на Kia, Seltos е скалило под супер-популарниот Sportage, но неговите димензии пренесуваат многу важна порака.
Како тоа? Па Seltos не е мал SUV – Seltos е само 5 сантиметри пократок и два сантиметри потесен од минатата генерација на Sportage и тоа всушност зборува колку сериозно настапува на глобалниот, европскиот, па и на нашиот пазар.
Интересно е што Seltos може да се добие со погон на предните или на сите четири тркала, а достапен ќе биде во неколку различни нивоа на опремa – Concept, Reference и X-Line.
Сега за сега немаме официјални цени, но очекуваме дека Seltos ќе биде навистина конкурентен на пазарот. Сите верзии на Seltos ќе го носат истиот 1.6-литарски T-GDI турбо-бензинец кој испорачува 180 коњски сили, а ќе може да се комбинира со мануелен менувач или 7-степенски DCT автоматски менувач со двојна спојка.
Инаку, дизајнот на Seltos е самоуверен и робустен. На прв поглед, се препознаваат интересните, мускулести форми кои се карактеристични за новите модели на Kia. Секако, повеќе за Seltos ќе пренесеме кога ќе го добиеме и на тест. Во меѓувреме, веќе можете да го погледнете во салонот на Kia во Скопје.
