Fiat пред неколку години го лансираше новиот 500 како целосно-електричен автомобил, но побарувачката за конвенционалните мотори не се намалува па италијанскиот бренд започна со производство и на верзија со хибриден бензински погон.
Првите хибридни верзии на Fiat 500 кои излегоа од фабриката Mirafiori во Торино се пред-продукциски модели, додека сериското производство е планирано да започне во Ноември годинава. Сега за сега, Fiat не објавува кој мотор ќе се вградува во хибридниот 500, но според некои извори, дознаваме дека Fiat 500 Hybrid ќе го добие 1-литарскиот три-цилиндерски хибриден бензинец кој се вградува и во моменталната бензинска верзија на Fiat 500.
Од друга страна, се навестува дека мооооожеби ќе го добие и 1.2-литарскиот хибриден турбо-бензинец кој е сèприсутен во портфолиото на Stellantis.
Според најавеното, се очекува дека од фабриката во Торино годишно ќе излезат околу 100.000 примероци од Fiat 500 Hybrid. Одлуката на Fiat да понуди поконвенционална изведба од новиот 500 не е изненадувачката – целосно електричниот 500е не ги исполни очекувањата на Fiat и производството неколку пати беше паузирано токму поради ниската побарувачка. Токму оваа реалност беше причината за Fiat да најави хибридна верзија.
Новиот Fiat 500 во хибридна верзија (и тоа со мануелен менувач) ќе пристигне кон крајот на годината.
