Audi TT RS Iconic Edition е придвижуван од 2.5-литарски 5-цилиндерски турбо-бензинец кој испорачува 400 коњски сили и 480 Nm вртежен момент кон сите четири тркала!
TT RS Coupe Iconic Edition прославува една четвртина век за TT Coupe. Специјалната изведба на TT RS ќе биде произведена во само 100 примероци и сите ќе ја носат фантастичната Nardo Grey сива боја. Дополнително, сите примероци ќе добијат Matrix LED предни светла и грст црни детали околу целиот автомобил – црни се предната маска, страничните прагови, страничните ретровизори и значките.
Забележуваме и црни 20-инчни тркала специјално дизајнирани за овој автомобил, а сите примероци ќе добијат и Aerokit кој вклучува преден сплитер, предни крилца, голем заден спојлер и заден дифузер.
Секако, специјален третман добива и кабината. Купувачите ќе добијат RS спортски седишта, како и елементи обвиени во супер-фина Nappa кожа и алкантара. Контрастните шевови се во жолта боја, а во седиштата ќе биде извезена ознаката Iconic Edition. Секој примерок ќе добие и нумерирана ознака на менувачот која дополнително ќе го означи ексклузивниот карактер на Iconic Edition.
Како и кај регуларниот TT RS, и тука срцето на перформансите е 2.5-литарскиот пет цилиндерски турбо-бензинец кој испорачува 400 коњски сили и 480 Nm вртежен момент. Силата ја испорачува кон сите четири тркала преку S-Tronic менувач со двојна спојка, а сето тоа значи лансирање до 100 километри на час за 3.7 секунди и максимални 280 километри на час.
