Германскиот тјунер ја прошири својата гама на модифицирани BMW M модели со додавањето на BMW M4 Convertible.
Спортскиот автомобил со две врати и покрив на собирање ги добива визуелните измени од неговите купе и седан изведби, заедно со зголемување на силата и подобрување на перформансите.
Започнувајќи од надворешноста, AC Schnitzer M4 Convertible добива поизразен преден сплитер, аеродинамички крилца, и карбонски украси на поклопецот на моторот. Автомобилот е поставен на 20-инчни AC3 фелни, а во понуда е и потрадиционалниот петокрак AC1 дизајн.
Купувачите ќе можат да одберат и AC Schnitzer налепници за каросеријата, заедно со заштитна фолија за карбонските странични прагови и отвори за воздух.
На задниот дел тјунинг компанијата нуди карбонски лип спојлер и фиксен заден спојлер за купе изведбата, што во теорија значи дека ќе бидат компатибилни и кај кабриолет верзијата. Последните измени на екстериерот се однесуваат на изменетиот дифузер со четирите интегрирани издувни цевки.
Опциите за ентериерот вклучуваат алуминиумски педали, лопатки за менување на степени, поклопец за i-Drive контролерот, како и држач за клучеви.
Што се однесува до перформансите, AC Schnitzer нуди нов сет на пружини кои го приближуваат автомобилот кон подлогата за 25-30 милиметри на предната и 20-25 милиметри на задната оска. Постои и опција за RS прилагодлива суспензија со прилагодувања на висината, затегањето и обивањето.
Неговиот 3.0-литарски шест-цилиндарски агрегат може да се засили на 610 кс и 750 Nm вртежен момент, благодарение на модификации во компјутерската единица и нов издувен систем. За споредба, стандардниот M4 Convertible произведува 510 кс и 650 Nm вртежен момент кај изведбата Competition.
