Новата Fabia Monte Carlo e врвна изведба на чешкиот компактен хечбек и ќе може да се комбинира со неколку различни мотори.
Fabia Monte Carlo добива грст црни детали – од предната маска и сплитерот, преку страничните прагови и капаците на страничните ретровизори, па сè до задниот спојлер и дифузерот во задниот браник. Забележуваме и Monte Carlo значки, затемнети прозорци и црнa Škoda ознака на задната врата. Дополнително, ако сакате можете да нарачате и црн кров.
Fabia Monte Carlo стандардно добива и LED предни светла, како и 16-инчни црни тркала а достапни се и поголеми, 17 или 18-инчни тркала.
Во кабината преовладува црната боја, но забележуваме и многу црвени акцентни детали. Плус, тука се одличните спортски седишта со интегрирани наслони за глава, како и спортскиот управувач обвиен во кожа.
Забележуваме и алуминиумски педали, црн тапацир на кровот, LED амбиентално осветлување и карбонски детали на централната конзола. Доколку сакате, можете да добиете и 10.25-инчни дигитални инструменти, како и Amundsen инфозабавен систем со 9.2-инчен централно-поставен дисплеј.
Бидејќи се работи за врвно ниво на опрема, Fabia Monte Carlo може да се комбинира со неколку различни мотори – ќе можете да ја нарачате со 1-литарскиот MPI со 80 коњски сили, или пак со 1-литарскиот TSI турбо-бензинец со 95 или 110 коњски сили, како и 1.5-литарскиот TSI турбо-бензинец со 150 коњски сили. Врвната изведба може да се комбинира само со DSG менувач со двојна спојка, а ваквата комбинација ѝ овозможува на Fabia да забрза до 100 километри на час за рамно 8 секунди и да достигне максимални 225 километри на час.
