full screen background image
Search

Визија за ново купе од Porsche како наследник на 928

Независниот Бразилски дизајнер Гиљерме Кноп ја претстави својата визија за наследник на популарниот историски модел Porsche 928.

Porsche 928 со својот футуристички дизајн, луксузната кабина со четири седишта, одличните перформанси и предвидливото управување го размрда светот кога беше претставен во 1977 година.

Иако најпрво беше замислен да го наследи моделот 911, сепак тој не успеа да освои повеќе купувачи од него и беше укинат во 1995, 18-години по неговото лансирање во производство.

Сепак, и покрај тоа 928 ги освојува симпатиите на денешните автомобилски љубители. Еден од нив е и Гиљерме Кноп, кој бил фасциниран од атрактивната форма на купето и создал модерна верзија на моделот.

Неговата визија не доаѓа со преголеми измени на карактеристичната форма. Дигиталниот концептен автомобил останува верен на структурата со предно поставен мотор и заден погон, а исто така ги задржува пропорциите на историскиот модел.

Како што е случајот со сите модерни автомобили, хипотетичкиот наследник на 928 е пораснат во димензии и е опремен со тркала со поголем дијаметар. Дизајнерот ги задржал специфичните дизајнерски елементи, но ги адаптирал со цел автомобилот да изгледа поскладно и помускулесто.

На предниот дел, светлата се позиционирани блиску до поклопецот, со што ги истакнуваат предните крила. Нивната навидум округла форма е инспирирана од оргиналните светла на отварање, но светлечката LED графика со четири елементи го следи најновиот дизајнерски тренд на Porsche.

Големото задно ветробранско стакло и триаголните странични задни прозорци се карактеристични за 928. Сепак, високо поставените задни светла се многу потенки и се уредени во сличен стил како електричниот модел Taycan.

Поврзано:   ПРЕМИЕРА: Porsche го претстави екстремниот, спектакуларниот Cayman GT4 RS!

Во кабината тука е исто така волан со историски инспириран дизајн, но модернизиран со додатоци од алуминиум. Инструмент панелот е исполнет со екрани, а се чини дека единствениот аналоген елемент е часовникот.

Мораме да признаеме дека концептот изгледа навистина интересно и веруваме дека би бил успешен модел доколку Porsche се реши да го произведе како пократка верзија од Taycan.



Отсекогаш Филип се интересирал за дизајнот и перформансите на автомобилите, а во срце му лежат легендарните спортски модели со забавен карактер кои можат да ги совладаат свиоците со огромна брзина.