Специјалните 812-модели кријат атмосферски V12 кој „врти“ до стратосферски 9500 вртежи во минута – и притоа испорачува 830 коњски сили и 695 Nm вртежен момент!
Како и обично, кога зборуваме за Ferrari, прво мораме да зборуваме за моторот. Под поклопецот на овие две специјални изведби се крие најновата верзија на 6.5-литарскиот атмосферски V12 на Ferrari кој сега е „дотеран“ да испорачува моќни 830 коњски сили и одлични 695 Nm вртежен момент. А да, и „врти“ до скоро неверојатни 9500 вртежи во минута!
Според Ferrari, многу од внатрешните компоненти се сменети или доработени за да бидат полесни и поиздржливи, за моторот да може да го издржи тој режим на работа. Силата се пренесува кон задните тркала преку рекалибриран 7-брзински автоматски менувач со двојна спојка – а резултат на сето тоа е 100 километри на час за само 2.85 секунди и максимална брзина која е повисока од 340 километри на час.
Секако, приказната не завршува таму – па завршетоците на издувниот систем кои се поставени во самите агли на задниот дел дозволуваат централно да биде поставен голем дифузер кој придонесува за дури 25% од вкупното зголемување на потисната сила во однос на „обичниот“ 812. Секако, тука е и задниот спојлер, како и предните аеро-додатоци кои ја подобруваат аеродинамиката. Интересно, кај 812 Competizione, задното стакло е целосно затворено, а тоа овозможува дополнителни подобрувања во аеродинамиката – тука се вортекс-генераторите кои го регулираат течењето на воздухот и ги подбруваат ефикасноста на спојлерот и на дифузерот.
Меѓу другото, новите модели го добиваат и најновиот Side Slip Control v7.0, нов систем за управување на задните тркала кој овозможува независно контролирање на задните тркала, како и специјални Michelin Cup 2 R пневматици и карбонски тркала. Од Ferrari кажуваат дека тежината на 812 Competizione е намалена за цели 38 килограми во однос на Superfast.
Е сега… Колку чини сето ова? Не знаеме – од Ferrari не откриваат ниту која е цената, ниту колку примероци ќе бидат произведени. Но ако мораме да шпекулираме, претпоставуваме дека првата бројка ќе биде екстремно висока, додека втората ќе биде прилично ниска. За првата да биде оправдана.