Британската групација подетално ја претстави технологијата за намалување на бучавата со која располагаат обновените Jaguar F-Pace, Jaguar XF и Range Rover Velar.
Системот користи технологија на активна акустика составена од сензори на секое тркало. Овие сензори постојано ги надгледуваат вибрациите од површината на патот и ја пресметуваат спротивната фаза на звучниот бран, потребна за да се отстрани бучавата која ја слушаат патниците. Овој систем исто така овозможува да се намали звукот при удар во дупки и вревата од возење над лоши површини.
Звукот за прикривање се емитува преку звучниот систем Meridian. Технологијата исто така има можност да проверува кои седишта од возилото се користат за да го оптимизира намалувањето на вревата за сите патници.
Според Jaguar Land Rover, оваа технологија може да ги намали несаканите врвови на бучавата до 10 децибели, а целокупното ниво на бучава до 3-4 децибели, со што придонесува да се намали заморот кај возачот.
Овој систем соработува заедно со системот за намалување на бучавата на моторот кај Plug-in хибридната конфигурација во P400e изведбата на новите Jaguar F-Pace и Range Rover Velar.
