full screen background image
Search

ТЕСТ: Citroën C3 Aircross 1.5 BlueHDI 100 Shine – Бестселерот на Citroën во вистинско издание!

Французите се неизмерно горди на C3 и C3 Aircross – и всушност, токму тие два модели се бестселерите на Citroën. Па кога ни се укажа можноста повторно да поминеме малку време со C3 Aircross – и тоа во неговото врвно издание – со задоволство ја прифативме понудата!

Прв пат седнавме зад управувачот на C3 Aircross пред нешто повеќе од две години – и уште тогаш, компактниот кросовер на Citroën ни остави позитивни впечатоци. Компактните димензии, футуристичкиот дизајн и модерните погонски единици се само неколку од многуте силни аргументи кои C3 Aircross ги има во својот агол. Сега, две години подоцна повторно сме со C3 Aircross – но овој пат во неговото врвно издание кое го носи името Shine и опремен со најновиот, 1.5-литарски BlueHDi турбодизел со 100 коњски сили.

Неколкуте години на пазарот воопшто не го „остареле“ C3 Aircross – тој и понатаму изгледа како концепт-автомобил!

Кога прв пат го возевме C3 Aircross, рековме дека наликува на концепт-возило – и тоа е и понатаму вистина. Неколкуте години на пазарот воопшто не го „остареле“ – напротив, тој и ден денес изгледа свежо и несекојдневно, особено кога ќе му нафрлиме малку интересни и привлечни детали. На пример, на нашиот тестен автомобил добивме детали – кровни носачи, странични ретровизори, декоративни елементи околу предните светла, на Ц-столбот и околу значките на алуминиумските фелни – во „дреч“ портокалово-црвена боја. Во нашите очи, ваквите детали изгледаат одлично – не само што го разигруваат дизајнот на C3 Aircross, туку и му помагаат уште повеќе да се издвои од конкурентите и му прилегаат на младешкиот, ексцентричен, Citroën-ест дух!

Моменталниот дизајнерски јазик на Citroën по сè изгледа им се допаѓа на купувачите – меките линии и површини оддаваат чувство на смиреност, кое како да недостасува меѓу агресивните дизајни на некои од конкурентите. Како што рековме – дизајнот на C3 Aircross изгледа свежо, без притоа да бидат искористени непотребни стилски трикови. Дополнително, заштитните панели околу целиот автомобил ја зајакнуваат сликата за робустност, како и навестуваат дека C3 Aircross може да го напушти асфалтот, доколку тоа го побарате од него.

Поврзано:   ПРЕМИЕРА: Официјално, ова се новите супер-модерни, супер-хај-тек Citroën C4 и ë-C4!

Комфорна, светла и практична кабина

Одиме внатре! Во кабината продолжува истата онаа приказна со деталите во боја – добиваме црвени детали на управувачот, на отворите за вентилација како и на седиштата. А седиштата? Седиштата се посебна приказна – како дел од амбициите на Citroën да ги понуди најкомфорните возила на пазарот, C3 Aircross добива супер-комфорни седишта во кои седењето е како да седите во фотелја. Само би посакале и совозачкото седиште да имаше наслон за рака.

Некои од површините во кабината – како на пример страничните потпирачи за рацете, како и горниот дел од предната конзола – се покриени во истиот материјал како и седиштата, и навистина ни се допаѓа! Ни се допаѓа одлуката да се понуди нешто друго освен гума, пластика или кожа – ваквите материјали се привлечни, пријатни на допир и би требало да се лесни за одржување.

Инаку, во целата кабина има многу места за одлагање ситници – во вратите, пред рачката од менувачот, во задните врати, итн. Сепак, бидејќи C3 Aircross е семеен компактен кросовер, мора да биде практичен, а тоа се заокружува со просторната понуда и на задната клупа, како и со багажникот во зависност од поставеноста на седиштата нуди 410, 520 или 1290 литри на располагање.

Како што напоменавме, седиштата се супер-комфорни, а благодарение на големите стаклени површини и прегледноста е одлична. Контролите се лесни за пронаоѓање и користење, дури и малку комплицираниот темпомат.

Имаме мала забелешка на некои од пластиките во кабината кои се цврсти – но затоа се издржливи. Многу од функциите се контролираат преку мултимедијалниот уред – и сè уште не сме фанови на ваквиот пристап, но трендовите се такви какви што се, а мултимедијалниот уред прилично брзо одговара на командите. Ќе ја истакнеме леснотијата за поврзување со мобилен телефон, а ќе го пофалиме и системот за навигација.

Поврзано:   ПРЕМИЕРА: Citroën го претстави новиот C4, како и ëлектричниот ë-C4!

Новиот 1.5-литарски BlueHDi ги исполнува најстрогите стандарди

Од неодамна, C3 Aircross се нуди со новиот 1.5-литарски BlueHDi турбодизел кој ги исполнува најновите и најстроги ЕУ норми за еколошка прифатливост. Новиот турбодизел испорачува 102 коњски сили при 3500 вртежи во минута и 250 Nm од 1700 вртежи во минута. Во комбинација со 6-степениот мануелен менувач, овој мотор му овозможува на C3 Aircross да забрза до 100 километри на час за 12.1 секунда и да постигне максимални 175 километри на час.

За време на нашето тест-возење, ние измеривме градска потрошувачка од околу 6.3 литри на 100 изминати километри, односно 5.3 литри на 100 изминати километри надвор од град. Одличниот вртежен момент и добро-одмерените степени на пренос значат дека C3 Aircross ќе „повлече“ лесно во скоро сите ситуации, а за екстра опуштено возење ние можеби би го нарачале со автоматски менувач.

C3 Aircross одлично се снаоѓа во град и на автопат, но не бега ниту од теренско возење.

Кога сме веќе кај возењето, каков е C3 Aircross за возење? Па како и досега – и сега е лесен за управување и маневрирање. Секако, нема никакви спортски претензии – и не ни треба да ги има – туку главниот збор го има комфорот. Суспензијата успева да ги исфилтрира нерамнините и само повремено се пренесуваат несакани вибрации во кабината. На отворено е навистина комфорно и се патува како во број-два поголеми автомобили.

Управувањето е доволно директно и прецизно – но повторно, ова не е спортски автомобил. Серво-управувачот е супер лесен, а 6-брзинскиот мануелен менувач е осетно попрецизен од 5-брзинскиот кој го замени.

Поврзано:   Stellantis е компанијата која произлегува од спојувањето на FCA и PSA

Дополнително, сакате да го напуштите асфалтот? Иако C3 Aircross не може да се добие со погон на сите четири тркала, напредниот GripControl систем кој ги регулира системите за стабилност и тракција гарантира дека излетите по терен нема да бидат никаков проблем. Секако, ова не е екстремен теренец, но стигнувањето до вашата викендичка или до некоја излет-локација нема да биде ама баш никаков проблем.

Заклучок: Совршено е јасно зошто токму C3 Aircross е еден од бестселерите на Citroën!

И на крајот – две-и-нешто-ситно години подоцна – какви се импресиите од C3 Aircross? Па – исти како и првиот пат кога го возевме. Дизајнот сè уште е свеж и интересен, кабината е просторна, практична и привлечна, а новиот турбодизел е исклучително економичен и сосем доволно моќен. Совршено ни е јасно зошто C3 Aircross е еден од бестселерите на Citroën – едноставно, ваквите аргументи „палат“ кај купувачите. Плус, кога ќе се земе предвид опремата и шармот – тогаш C3 Aircross е во вистинско светло!

Димензии

Спецификации

Модел: Citroën C3 Aircross 1.5 BlueHDi 100 Shine
Мотор: 1.5-литарски турбодизел, 4 цилиндри
Моќност: 102 коњски сили / 3500 вртежи во минута
Вртежен Момент: 250 Nm / 1750 вртежи во минута
Менувач: Рачен, 6 брзини
0-100 км/ч: 12.1 секунда
Максимална Брзина: 175 километри на час
Должина: 4155 mm
Ширина: 1976 mm (со странични ретровизори)
Висина: 1630 mm (со кровни носачи)
Тежина: 1203 килограми
Меѓуоскино Растојание: 2604 mm
Багажен Простор: 410 – 520 – 1289 литри
Потрошувачка: 6.3 литри на 100 километри (измерена, градска)
Цена на основниот модел: Citroën C3 Aircross 1.2 Puretech BVM Live – 13.990 Евра
Цена на тестираниот модел: Citroën C3 Aircross 1.5 BlueHDi 100 BVM Shine – 19.530 Евра
Повеќе Информации: Citroën.com.mk

Фотографии



Алфа и Омега на CARclub. Играчките остануваат, само стануваат поскапи.