full screen background image
Search

ТЕСТ: Toyota Auris Touring Sports 1.8 Hybrid Fancy – Практичен и економичен караван!

Toyota сака нешто да докаже со хибридниот каравански Auris – а тоа е дека хибридните автомобили можат да бидат исто толку практични и секојдневно-корисни како и нивните конвенционални браќа.


Auris не е нов автомобил на нашите патишта – а не е нов ниту на нашите страници – ова е четврта верзија на Auris од тековната генерација која „била во наши раце.“ Приказната започна со стандардниот, бензински Auris со 1.6-литарски атмосферски бензинец, потоа се дружевме со Auris Hybrid, па на крајот со „основниот“ Auris и неговиот 1.33-литарски бензинец. Конечно, во наши раце е можеби најнесекојдневната варијанта – Auris Hybrid во караванска изведба.

Караван? Секако!

Караван? Да, секако! Иако не се премногу популарни на нашиот пазар, караваните се неизмерно практични и корисни, без притоа да морате да купите кросовер или SUV. Практичноста доаѓа во форма на голем багажен простор, но и помали трошоци за одржување во однос на SUV.

Линијата на Auris добро ја познаваме – единствено задниот дел е продолжен (и тоа за скоро 27 сантиметри) и визуелно изменет. Инаку – ова е веќе добро-познатиот Auris. Навистина нема потреба премногу да зборуваме за дизајнот – само ќе споменеме дека изгледа модерно и европски, со примеси на неизбежниот јапонски карактер на Toyota. Предниот дел е идентичен со хечбекот, а главните разлики се – очекувано, нели – во задниот дел.

Комфорен и исклучително квалитетен ентериер

Слична е приказната и во ентериерот – ова не е кабина која ни е непозната. Сосем лесно се снајдовме со сите контроли и прекинувачи, а веднаш станува јасно дека комфорот е главната цел на инженерите и дизајнерите на Toyota, а за квалитетот не треба да зборуваме – сепак се работи за Toyota.

Поврзано:   Големиот Toyota Camry пристигна и кај нас!

Доволно простор има како на предните седишта, така и на задната клупа. а во кабината има доволно места за одлагање ситници – но неизбежно, најинтересниот детал е рачката на CVT менувачот која изгледа како мал џоистик.

Сепак, главниот адут тука е товарниот простор – кој го има на претек. Караванот има цели 170 литри повеќе багажен простор во однос на стандардната изведба, односнo 530 литри. Спуштете ги задните седишта и ќе имате на располагање вкупно 1658 литри. Она што радува кај караванскио Auris е мултилинк задната суспензија која сосем компетентно се справува како со зголемената тежина, така и со можеби поголемиот товар кој ќе го носите.

Примарен акцент е даден на комфорот и економичноста

Кога веќе зборуваме за суспензијата – како што веќе напоменавме, главниот збор тука го има комфорот. Auris едноставно „ги пегла“ нерамнините од нашите улици а хибридниот погон сам по себе инсистира да возите опуштено и дефанзивно за возењето да го претворите во своевидна видео-игрица. Целта на оваа игра е да се победите самите себеси, односно да видите колку ќе успеете да ја „спуштите“ потрошувачката на хибридниот систем.

Бидете крајно внимателни и дефанзивни, и воопшто нема да биде чудно доколку видите просечна потрошувачка која започнува со бројката 4, а со регуларно возење низ градскиот метеж очекувајте потрошувачка од околу 5.3 литри на 100 изминати километри. Со оглед на големината на Auris и временските услови – тоа е бројка за почит!

Auris е ненаметлив – и заради тоа е толку привлечен!

Ненаметливиот карактер на Auris преовладува со искуството – зад управувачот е комфорно и лесно се совладуваат како градските гужви, така и голтањето километри на отворен пат. Она што е особено привлечно кај Auris е токму неговата искреност – ова не е позерски SUV или некој фенси-шменси-гледај-ме-мене хибрид кој „вреска“ со својата различност – ова е искрен, доверлив и практичен автомобил кој импресионира со малку старошколски вредности кои како да ги подзабораваме.

Поврзано:   ГАЛЕРИЈА: 2019 Авто Плус Street Show

Во трката за „спортско ова, спортско она“, хибридниот Auris повторно се наметнува како алтернативен, но навистина солиден избор – особено за оние кои се подготвени да погледнат барем малку подалеку од традиционалните кандидати.

На самиот крај – каде припаѓа Auris, поточно токму оваа, хибридна караванска изведба? Ова е автомобил за оние кои гледаат малку подалеку од „естаблишментот“ и се подготвени да го преземат следниот чекор – без разлика дали се приватни купувачи или пак компании. Хибридизацијата е неизбежен чекор напред кон целосната електрификација, а Toyota го прави тоа тооооолку добро.

Практичноста, доверливоста и комфорот на Auris се неговите најмоќни адути, а економичноста која доаѓа благодарение на хибридниот погон е само одличен бонус во приказната. А бонусите се секогаш добредојдени, нели?

  • Мотор: 1.8-литарски атмоферски бензинец, 4 цилиндри + електромотор
  • Моќност (системска): 136 коњски сили
  • Вртежен момент: 142 Nm / 4000 вртежи во минута
  • Максимална брзина: 180 км/час
  • Забрзување 0-100: 10.9 секунди
  • Должина: 4595 mm
  • Ширина: 1760 mm без странични ретровизори
  • Висина: 1485 mm
  • Тежина: 1425 kg
  • Меѓуоскино растојание: 2600 mm
  • Багажен простор: 530 – 1658 литри
  • Потрошувачка на 100 км: 5.3 литри (измерена, градска)
  • Цена на тестираниот модел: Auris Hybrid Touring Sport Fancy – 20.490 Евра
    Повеќе информации: Toyota.com.mk

Фотографија: Дејан Маликовски



Алфа и Омега на CARclub. Играчките остануваат, само стануваат поскапи.