full screen background image
Search

Женева 2017: Infiniti го претстави брзиот и жесток Q60 Black S Hybrid Concept

Infiniti во соработка со тимот на Renault Sport F1 го направи Q60 Black S – кој е „опремен“ со 400 коњски сили и KERS систем.

Направен со цел да ја прослави техничката соработка помеѓу двата тима, концептот е придвижуван од 3-литарски V6 твин-турбо бензински мотор со 400 кс и KERS генератор во F1 стил, кој ја подигнува целосната моќност на 500 „коњи“.

Уникатниот погон е развиен заедно од инженерите на Infiniti и Renault во седиштето на F1 тимот во Франција. Мотор-генераторот ја собира енергијата која се создава при сопирање и топлината од издувните гасови, а потоа ја складира во модул од литиум-јонски батерии. На крај, таа енергија се користи да ја зголеми испораката на моторот и побрзо да ги заврти турбополначите.

Каросеријата доби целосен редизајн и сега располага со целосно нови и агресивни браници, странични прагови, отвори за вентилација на поклопецот од моторот, големи титаниумски издувни цевки и огромен заден спојлер. Новиот дизајн е целосно функционален и обезбедува значително поголема потисна сила. Тркалата се исто така специјално дизајнирани за Q60 Black S и се со големина од 21 инч.

Infiniti вели дека нема да лансира сериски модел базиран на овој концепт сеуште, но сака да го согледа јавниот интерес за модели со високи перформанси.



Отсекогаш Филип се интересирал за дизајнот и перформансите на автомобилите, а во срце му лежат легендарните спортски модели со забавен карактер кои можат да ги совладаат свиоците со огромна брзина.