Германскиот производител ги објави првите официјални фотографии од караванската изведба на новата Astra, пред официјалната премиера во Франкфурт!
Новата Astra Sport Tourer ги има истите димензии како и минатиот модел – долга е 4702 милиметри, широка 1871 милиметар (со склопени странични ретровизори) и висока е 1499 милиметри, но затоа е цели 130 килограми полесна од соодветниот модел во заминување.
Сепак, има значително повеќе простор во ентериерот, а со преклопени задни седишта стојат на располагање вкупно 1630 литри багажен простор. Дизајнот е модерен и привлечен, со чисти површини и јасно дефинирани линии. Во понудата ќе се најдат неколку бензински и дизел мотори со капацитет од 1 до 1.6 литри. Врвот на понудата (сега за сега) ќе биде 1.6-литарскиот Ecotec бензинец со директно вбризгување кој нуди одлични 200 коњски сили и 300 Nm вртежен момент.
Би било интересно доколку Opel реши да направи OPC изведба на Astra Sports Tourer и да конкурира на етаблираните германски конкуренти, нели?
