KIA не успеа да се воздржи а да не објави уште детали за Pro_Cee’d GT, кој како што знаеме треба да биде ривал на веќе докажаните градски спортисти!
Неодамна KIA соопшти дека идната година најверојатно ќе биде претставен еден нов спортист – Pro_Cee`d GT, а сега Корејците нестрпливи објавија дека тоа веќе не е само идеја. Pro_Cee’d GT и Cee’d GT под поклопецот ќе го имаат 1.6 GDI турбо бензинецот кој испорачува 201 КС и 265 Nm, а ќе биде поврзан со стандардниот шест степен мануелен менувач.
Според официјалните детали, Pro_Cee’d GT ќе забрзува од 0 до 100 km/h за 7.9 секунди, бројка која иако ниска, сепак не е доволна за да им парира на конкурентите. Корејците објавија дека шасијата и суспензијата ќе претрпат поголеми модификации со што возењето во овој автомобил биде подинамично!
Исто така, Pro_Cee’d GT ќе добие нов преден и заден браник, заден дифузер, нови уникатни 18-инчни фелни и специјална боја. Внатре треба да не пречекаат Recaro спортски седишта.
KIA најави дека производството на Pro_Cee’d GT и Cee’d GT ќе започне во Мај наредната година, а продажба се закажува за идното лето. Ова значи дека сериската изведба на овие модели ќе ја видиме најдоцна до саемот во Женева, а ние сме нестрпливи!
