Официјално: 2013 Opel Cascada – CARclub.mk | #1 за Автомобилите full screen background image
Search

Официјално: 2013 Opel Cascada

Opel денес ја претстави новата премиум кабриолет варијанта од Astra, наречена Cascada, која ќе излезе на пазарот во Европа следната пролет.

Opel ја планира новата Cascada како премиум модел и затоа сака да ја оддели од останатиот дел од гамата на Astra и покрај тоа што дели многу компоненти со неа. Скоро сите делови од каросеријата на Cascada се нови, а должината на возилото е зголемена на 4.69m. Ова ја прави подолга од Audi A5 Cabrio, како и од стандардниот компакт Astra.

Како што доликува за еден автомобил од премиум сегментот, Cascada е опремена со софистицирана предна суспензија преземена од Insignia OPC и задна оска со паралелно поврзување. Мекиот покрив е целосно автоматски. За негово кревање или спуштање се потребни само 17 секунди, а ова може да се направи при брзини до 50 км/ч. Изборот на тркала се состои од алуминиумски фелни со големина од 17 до 20 инчи во дијаметар.

Понудата на мотори вклучува бензински и дизел агрегати, сите потпомогнати од турбополнач. Силата се пренесува само кон предните тркала преку шест-степен рачен или шест степен автоматски менувач.

Врвот во гамата е новиот 1.6-литарски четири-цилиндарски агрегат со директно вбризгување и турбополнач. Тој произведува 170 кс и 280 Nm вртежен момент. Најсилниот дизел е 2.0-литарскиот турбодизел со 165 кс и 380 Nm вртежен момент, но Opel ветува дека ќе претстави уште посилни бензински и дизел агрегати во блиска иднина.

Што се однесува до внатрешноста, таа е опремена со електрични затегнувачи на појасот, Nappa кожен тапацир, системи за ладење и затоплување на седиштата, комотен простор за возрасни, електрично прилагодување на седиштата, плус цел сет од активни и пасивни системи за безбедност, како камера мониторинг системи, предупредување за мртва точка, помош при паркирање и тргнување по нагорнини и многубројни воздушни перничиња.



Отсекогаш Филип се интересирал за дизајнот и перформансите на автомобилите, а во срце му лежат легендарните спортски модели со забавен карактер кои можат да ги совладаат свиоците со огромна брзина.