Иако надвор во моментов нема снег, замислете дека има. Замислете дека е десеттина степени под нулата и дека треба да наместите ланци на вашето возило. Да видиме како се прави тоа!
Со овие инструкции како се местат ланци за снег го почнуваме новиот дел на нашиот портал – Направи Сам. Тука ќе понудиме ситни но корисни совети за секојдневни проблеми со кои можеби ќе се соочите.
Да не должиме и да се фатиме за работа!
Потребни ќе ви бидат следниве „состојки“:
- 1 (еден) автомобил, по желба.
- 1 (еден) сет ланци за снег, во димензии кои одговараат веќе-одбраниот автомобил.
- 1 (еден) пар ракавици (не е задолжително, но е препорачливо)
- ∞ (многу) нерви. Колку е поладно, толку повеќе нерви.
1. Паркирајте го автомобилот со тркалата поставени право. Извадете го едниот од ланците од кутијата и расплеткајте го пред погонското тркало.
2. Протнете ги ланците зад тркалото и проверете дали има нешто заплеткано или заглавено.
3. Обрачот од ланците извлечете го над тркалото и спојте ги краевите.
4. Повторно проверете ги сите делови од ланецот и спојте ги средните делови од ланецот.
5. Повлечете го обрачот зад тркалата и проверете дали еднакво е оддалечен од сите рабови на тркалото. Ланецот треба да лежи на нагазната површина од гумата.
6. Спојте ги и останатите вериги од ланецот, притегнете ги краевите за да нема никакво непотребно движење.
Честито, само што успешно наместивте ланци за снег на едното погонско тркало! Сега постапката повторете ја и на другото погонско тркало!
Запомнете:
- Ланците треба да се добро стегнати, за да нема никакво непотребно движење на ланецот. Доколку има, тој може да се откачи и сериозно да го оштети вашето возило.
- Процедурата за местење на ланци не е иста за сите видови ланци. Ние избравме еден од најсекојдневните пакети, но постојат и други.
- Ланците се местат на погонските тркала!
Значи..
Вака… Не вака…
На крај, да му се заблагодариме на DayWalker од нашиот форум, кој несебично ни ја позајми неговата Ford Fiesta како и неговите ланци за снег!
Вака се местат ланци ако имате страничен погон.. :)
.. а инаку, како што што веќе напоменавме, ланците се местат на погонските тркала!
Фотографија: Кристијан Ивановски