Nissan официјално го именуваше Метју Вивер за нов глобален шеф за дизајн, позиција што ќе ја преземе од 1 октомври 2026 година.
Тој ќе го наследи Алфонсо Албаиса, кој по речиси една деценија на чело на дизајнерскиот оддел ќе остане во компанијата како советник до крајот на годината, со цел да обезбеди непречена транзиција.
Вивер не е ново име во Nissan. На британскиот дизајнер ова ќе му биде кулминација на кариерата која започна во јапонската компанија уште во 2001 година. Пред тоа работеше во Ford и Volkswagen, а во Nissan постепено напредуваше низ неколку клучни дизајнерски позиции. Од 2020 година беше потпретседател на Nissan Design Europe во Лондон, а минатата година се пресели во глобалниот дизајнерски центар во Јапонија како Senior Design Director.
Автомобилските ентузијасти најмногу го поврзуваат со првата генерација на Nissan Juke – модел кој со својот неконвенционален изглед целосно ги подели мислењата, но истовремено постави нов тренд во SUV сегментот. Вивер има значајна улога и во развојот на Qashqai, еден од најуспешните европски модели на Nissan, кој со години е меѓу најпродаваните кросовери на континентот.
Од друга страна, Алфонсо Албаиса зад себе остава богато наследство. Во текот на неговиот мандат беа создадени модели како актуелниот Nissan Z, електричниот Ariya, како и бројни Infiniti концепти и сериски автомобили. Тој беше и првиот нејапонец кој ја предводеше глобалната дизајнерска дивизија на еден голем јапонски производител.
Промената доаѓа во период кога Nissan се обидува да ја зацврсти својата позиција со новата корпоративна стратегија Re и серија нови модели кои ќе пристигнат во следните години. Дел од нивните дизајни веќе се финализирани, но токму Вивер ќе биде човекот што ќе го дефинира визуелниот идентитет на следната генерација автомобили на јапонскиот бренд – од електрични модели до нови SUV и спортски автомобили.
Со оглед на неговото искуство, особено во европскиот дизајнерски центар, се очекува Nissan и понатаму да се потпира на препознатлив, смел и модерен дизајнерски пристап, но со поголем акцент на глобалната привлечност и електричната иднина на брендот.
