Ширум планетата се чувствуваат вибрации од колективното превртување со очи на автомобилските ентузијасти.
Трансформацијата на Mitsubishi продолжува, и како што јапонскиот бренд (барем во Европа) цврсто чекори нанапред со продавање ребрендирани модели на Renault, во САД и Канада ќе биде лансиран нов Mitsubishi Eclipse кој е всушност… Ребрендиран Nissan Leaf.
Ах, Mitsubishi Eclipse. Да, оној „првиот“ зелениот автомобил од Fast & Furious и автомобилот кој многумина од нас го возеа во Need For Speed Underground (и Underground 2, секако!). Автомобилот кој за многу млади ентузијасти ширум светот беше првиот контакт со автомобилите. Пред неколку години Mitsubishi го трансформираше Eclipse од ниско спортско купе во (малку незграпен) SUV-coupe со името Eclipse Cross, за потоа европскиот модел да стане ребрендиран Renault Scenic, а денес (барем за САД и Канада) станува електричен кросовер. Поточно, ребрендиран Nissan Leaf.
И добро, ако сме искрени – тоа и не е толку лошо. Nissan Leaf е одличен електричен автомобил и првенец во многу нешта. Дизајнерите на Mitsubishi му дале дискретно редизајниран преден дел и внимателно чепнат заден дел, како и нови значки. Кабината добива неколку нови значки и ознаки, но во суштина – ова е Nissan Leaf. А тоа значи батерии со капацитет од 52 до 75 kWh и електромотор кој испорачува 176 или 218 коњски сили. Во зависност од батеријата, автономијата може да биде и скоро 500 километри. И сето тоа е спакувано во супер-аеродинамична и ефикасна форма.
Секако, сето ова има логика – Mitsubishi е дел од Renault-Nissan алијансата и на јапонскиот гигант му се достапни проверени, докажани технологии. Интересно е што Mitsubishi најавува и моделска офанзива, односно по еден нов или темелно ревидиран автомобил до 2030. Во моментов во Европа се продаваат неколку различни модели – Colt, ASX, Grandis и Eclipse Cross се ребрендирани Renault Clio, Captur, Symbioz и Scenic, соодветно, како и Outlander PHEV кој е изворен модел на Mitsubishi.
