Со продажбата на уделот на Porsche во Bugatti Rimac, Volkswagen групацијата која го воскресна Bugatti официјално веќе нема никаква поврзаност со францускиот бренд.
Porsche ги продаде своите удели во Bugatti Rimac и Rimac Group. Новиот сопственик (кога ќе завршат сите административни процедури) ќе биде инвестициската куќа HOF Capital од Њу Јорк. Со ова, се отвора пат Мате Римац и HOF Capital да го предводат следното поглавје на Bugatti, но и на хрватскиот Rimac. Кога ќе заврши процедурата, HOF Capital и Мате Римац ќе бидат најголемите акционери во Rimac Group.
Porsche поседуваше 45% од Bugatti Rimac и 20.6% од Rimac Group. Сега за сега, ниту Porsche ниту HOF Capital не кажуваат за колку пари се продадени уделите, но тоа секако ќе биде објавено како дел од годишните финансиски извештаи на Porsche.
И со ова, завршува можеби најславната ера на Bugatti. Volkswagen Group го купи легендарниот бренд во 1998 и под внимателното око на Prof. Dr. Ferdinand Piëch го воскресна со автомобилот кој стана бенчмарк за хипер-автомобилите – незаменливиот и препознатливиот Veyron. По Veyron следуваа Chiron и Tourbillon, но токму Veyron ќе биде автомобилот кој означи старт на нова парадигма и нов пристап кон хипер-автомобилите. Времето секогаш ќе се дели на Пред Veyron и По Veyron.
