Kia неодамна подготви навистина темелно освежување за Stonic. Освежување кое допира толку многу работи, па всушност новиот Stonic навистина можеме да го наречеме – нов.
Со освежувањето, Stonic доби нов лик, нов ентериер и нови погонски оппции. Дизајнот на Stonic ги следи насоките на новите, електрични модели на Kia, но и на поголемите Sportage и Sorento.
Кабината е темелно модернизирана, со нови дигитални инструменти и грст нови технологии. Веќе нема никаков траг од конвенционални, аналогни инструменти – сè е дигитално. Кокпитот добива два 12.3-инчни екрани и многу од физичките контроли се преместени токму на инфозабавниот систем.
Кабината добива и целосно-нов управувач, амбиентално осветлување, безжичен полнач за мобилен телефон и неколку USB-C приклучоци. Всушност, ако не се лажеме – нови се и седиштата.
Модернизирана е и погонската понуда. Веќе го нема атмосферскиот бензинец – сега Stonic може да се добие само со 1-литарски T-GDI турбо-бензинец со 100 коњски сили кој може да се комбинира со автоматски или мануелен менувач.
Stonic наскоро ќе пристигне во нашата редакција на тестирање, а во меѓувреме можете да го посетите салонот на Kia или пак официјалната веб-страница на Kia за Македонија.
