Вчеравечер неочекувано Renault објави дека по пет години на чело на групацијата, Luca de Meo си заминува од францускиот бренд, но и од автомобилската индустрија.
Luca de Meo има интересно портфолио. Неговиот почеток е во Fiat, каде своевремено беше на чело на Fiat, па потоа и на Alfa Romeo. Всушност, тој беше на чело на Fiat кога италијанскиот бренд го лансираше новиот 500. Во Renault пристигна од Volkswagen групацијата, каде имаше важен удел во реструктурирањето на SEAT, но и лансирањето на Cupra. Во Renault помина пет години и пристгна во време кога Renault се соочуваше со многу предизвици.
За само пет години, de Meo го трансформираше францускиот бренд преку подобрување на квалитетот, воведување на производи каде маржите се повисоки и значително намалување на времето потребно за развој на нови модели. Под негово водство, Renault лансираше супер-популарни нови модели, меѓу кои се целосно-електричните Reault 4 и Renault 5, а следната година треба да пристигне и новото Twingo. De Meo имаше огромен удел и во успехот на Alpine.
Изненадувачки, информацијата која пристигна најавува дека de Meo не само што си заминува од Renault, туку си заминува и од автомобилската индустрија. Францускиот Le Figaro пренесува дека de Meo ќе биде нов главен извршен директор на Kering – француска групација на луксузни брендови која е сопственик на марки како Gucci, Balenciaga и Yves Saint laurent.
De Meo си заминува од Renault на 15-ти Јули, а во меѓувреме францускиот бренд е во потрага по нов главен извршен директор. Сега за сега, нема информации околу потенцијалниот наследник на de Meo, но вистината е дека тој нема да биде лесно заменет.