Секоја година преку Porsche Driving Experience ги славиме коњските сили, моќните перформанси и чистото, незауздано уживање во возењето. Меѓу другите автомобили, годинава за прв пат седнавме зад управувачот на новиот 911 Turbo S, но и електричниот Cayenne Turbo Electric!
Секоја година со нетрпение го очекуваме сега веќе своевидно традиционалниот Porsche Driving Experience – настанот на кој имаме можност да седнеме зад управувачите на безмалку целата понуда на Porsche и самите да ги искусиме најновите достигнувања на германскиот бренд. Всушност, едноставно – едвај чекаме да возиме Porsche!
Оваа година на располагање имавме неколку различни модели – меѓу другото седнавме зад управувачите на Macan Electric во GTS изведба, моќна Panamera Turbo E-Hybrid и Cayenne S E-Hybrid.
Новиот електричен Macan ни е веќе познат, го возевме во Macan 4S изведба, но ознаката GTS значи дека одиме скалило погоре во хиерархијата, а тоа пак значи 571 коњска сила при Launch Control, 100 километри на час за 3.8 секунди и максимални 250 километри на час. Впечатоците се слични на оние кои веќе ги имаме од Macan 4S, но сега сè е малку… Повеќе! Повеќе сила, повеќе брзина, повеќе… Сè!
Panamera Turbo E-Hybrid комбинира 4-литарски твин-трубо V8 кој испорачува 519 коњски сили и 770 Nm вртежен момент, со електромотор кој испорачува дополнителни 190 коњски сили и 450 Nm вртежен момент. Резултат на сето тоа се системски 680 коњски сили и 930 Nm вртежен момент, односно катапултирање до 100 километри на час за 3.2 секунди и максимални 315 километри на час. Ова е наша прва шанса да седнеме зад управувачот на новата Panamera – и не нè разочара. Зад управувачот на големиот, моќен спортски седан се чувствуваме како да седиме зад управувачот на 911 Turbo, но малку поголем. Panamera едноставно голта километри.
Следен модел „на распоред“ е големиот Cayenne S E-Hybrid. Големиот SUV комбинира 3-литарски твин-турбо V6 со електромотор, за вкупна системска моќност од 519 коњски сили и здрави 750 Nm вртежен момент, кои пак му овозможуваат на Cayenne S E-hybrid да забрза до 100 километри на час за 4.7 секунди и да достигне максимални 263 километри на час. Она кое секогаш нè импресионирало кај Cayenne е талентот на овој SUV да не се однесува како SUV. Всушност, чувството зад управувачот на Cayenne е повеќе како да сме во супер-спортски и супер-моќен хечбек, а не во голем и тежок SUV.
И конечно, доаѓаме до (за нас) двата најинтересни модели. Првиот е новиот Cayenne Turbo Electric, кој при Launch Control испорачува (подготвени?) 1156 коњски сили. А инаку, стандардно, Cayenne Turbo Electric има на располагање „само“ 857 коњски сили, плус со Push-To-Pass краткотрајно добива дополнителни 175 коњски сили. И тогаш е како да „играте со шифри“. Бидејќи на располагање имате 1000 коњски сили. Па ако тоа не ви е доволно за претекнување, тогаш…
Всушност, перформансите на Cayenne Turbo Electric најверојатно во некој друг свет не се легални. Големиот, тежок SUV забрзува нанапред со ентузијазам и неуморност кои како да не се од оваа планета. Како големиот SUV да не забрзува толку, колку што ја помрднува планетата под него. И перформансите создаваат зависност бидејќи сакавме да ги истражуваме до нивниот максимум пак, и пак, и пак… Спринтот до 100 километри на час трае само 2.5 секунди – бројки кои само до пред неколку години беа резервирани за супер-скапи хипер-автомобили со егзотични имиња. Сега… Сега можете да ги имате и вие.
И конечно, пристигнуваме дома. Односно, седнуваме зад управувачот на 911 Turbo S, во неговата најнова изведба. Со најновата итерација, 911 Turbo S стана хибриден супер-автомобил, односно Porsche ги искористи сите свои познавања од областа на електрификацијата за да ги подобри перформансите на 911 Turbo S и да ги издигне на сосем ново ниво.
Резултат на сето тоа? 711 коњски сили и 800 Nm вртежен момент, односно катапултирање до 100 километри на час за само 2.5 секунди и максимални 322 километри на час. Интересно е што сега максималниот вртежен момент е достапен од 2300 па сè до 6000 вртежи во минута, а електричните турбо-полначи испорачуваат инстантен притисок, односно инстантни перформанси. И повторно, 911 Turbo S се наметнува како секојдневно-употреблив, секојдневно корисен супер-автомобил. Ова е она од кое соништата се направени…
Како и секоја година, така и годинава Porsche Driving Experience е прослава на коњските сили, перформансите и суштинското уживање во автомобилите. Настан кој секоја година го очекуваме, настан на кој му се радуваме и настан на кој секоја година со задоволство учествуваме. И секако, возење кое го паметиме.
