ПРЕМИЕРА: Opel го откри грандиозниот нов Grandland! – CARclub.mk | #1 за Автомобилите full screen background image
Search

ПРЕМИЕРА: Opel го откри грандиозниот нов Grandland!

Новиот знаменосец на Opel е првиот модел на германскиот производител изграден врз STLA Medium платформата – а тоа ветува врвен електричен погон со автономија до 700 километри, како и ефикасни хибридни погони, супер-современи технологии и беспрекорно возачко искуство.

Целосно-електричниот Grandland ќе се нуди со батериски модул со 73 kWh или 98 kWh, a STLA Medium платформата е поставена врз 400-волтна архитектура. Ова овозможува брзо DC полнење со моќ до 160 kW, но и автономија до 700 километри. Секако, тука се и верзиите со мотори со внатрешно согорување – докажаниот 1.2-литарски турбо-бензинец ќе се комбинира со 48-волтна хибридна технологија, а за понатаму е најавена и плаг-ин хибридна верзија која ќе може да помине до 85 километри со полни батерии.

Инаку, новиот Grandland е вистински исчекор за германскиот бренд. Зошто? Ако Opel ги најави своите амбиции уште пред неколку години, за потоа да ги потврди и да ги бутне скалило нагоре со лансирањето на новата Astra, тогаш со новиот Grandland пристапот на Opel постигнува кулминација.

Доминираат чисти површини и остри линии – од предниот дел со карактеристичниот Vizor и новиот светлечки Opel Blitz, преку едноставниот профил кој суптилно го прекршуваат контрастни линии, па сè до задниот дел со широкиот одноделен светлосен елемент, тенките задни светлосни групи и осветленото Opel име – дизајнот на Grandland е полн погодок!

Слично е и во кабината, каде едноставно доминира огромниот 16-инчен инфозабавен систем. Покрај него, кабината добива и надграден хед-ап дисплеј и хај-тек AGR седишта со електрични странични ѕидови, вентилација и масажа. Всушност, Grandland е изграден од високо-технолошки решенија – на пример, тука се новите Intelli-Lux Pixel Matrix HD предни светла кои имаат повеќе од 50.000 LED елементи (поточно, 51.200, по 25.600 на секоја страна) за врвно осветлување со супер-прецизна дистрибуција на светлината.

Поврзано:   ПРЕМИЕРА: Opel ја претстави новата Frontera

Сега за сега нема официјални информации кога ќе пристигне Grandland на пазарот, но очекуваме тоа да се случи до крајот на годината.



Алфа и Омега на CARclub. Играчките остануваат, само стануваат поскапи.