Opel го исполни ветувањето и направи вистински примерок од Rocks E-Xtreme, кој е дизајниран од младиот студент Lukas Wenzhöfer.
3D моделот на Lukas Wenzhöfer победи на #OpelDesignHack натпреварот кој го организираше германскиот производител, а наградата е токму тоа – 3D визијата на дизајнерот да биде преточена во вистински автомобил.
Според Opel, одлуката токму Rocks E-Xtreme да биде победник била едногласна, а одлучувале одбрани специјалисти. Тимот на Opel внимателно ги анализирал сите делови и компоненти од дизајнот на Lukas Wenzhöfer и многу од компонентите се направени со помош на напредно 3D-печатење.
За Rocks да биде E-Xtreme, тој добива пошироки оски и проширени крила за да може да бидат вградени тркала обвиени во теренски пневматици. Надградената суспензија овозможува поголемо растојание од подлогата, а тука е заштитниот кафез околу целиот мал автомобил. Rocks E-Xtreme добива и редизајниран преден дел кој го инкорпорира Opel Vizor дизајнеркиот елемент на брендот, а добива и редизајнирани LED предни светла. Верувале или не, задниот спојлер е од Vectra GTS V8 DTM тркачки автомобил – и изгледа фантастично!
Opel Rocks E-Xtreme е произведен во само еден примерок и нема планови за негово сериско производство, но од Opel кажуваат дека малиот електричен теренец ќе посети многу настани за што повеќе фанови да имаат можност да се запознаат со него.
