full screen background image
Search

Давидовски е на петтото место во генералниот пласман во TCR Europe

Вториот гран при викенд од европското ТЦР првенство се одржа на улиците во По, Франција – локација каде постои едновековна традиција во организација на трки.

Македонскиот возач Виктор Давидовски имаше импресивен настап, при што во првата трка стигна до четвртото место (откако стартуваше седми), но за волја на вистината почетокот на гран при викендот беше одбележан од дождливото време кое им ја отежнуваше работата на возачите и инженерите за подготовка на автомобилите за соодветните временски услови.

„Променливите временски услови овозможија да има изненадувања, бидејќи инженерите во дадени моменти мораа да работат на штелувањето на возилата врз основа на метеоролошките прогнози, па имаше возачи кои ризикуваа да одат со „сет-ап“ за суво или влажно. И покрај тоа, мислам дека имавме добро подготвен автомобил, но морав да ги следам и инструкциите од тимот и да не преземам голем ризик. Конкретно, во првата трка иако бев петти, добив инструкција од тимот дека еден од возачите пред мене ќе добие казна поради предвремен старт, па дека не е пожелно да напаѓам за да престигнам во такви околности. Стратегијата беше да ја чекаме својата шанса во втората трка, кога распоредот на стартот беше во наша корист.“ – изјави Виктор.

Давидовски согласно пропозициите стартуваше како четврти на втората трка во По, при што уште на стартот го помина Жулиен Нугаре, а потоа и тимскиот колега Џон Филипи, по што постигна најбрз круг и се најде веднаш зад лидерот Том Коронел.

„Во неделата имав чувство дека имам одличен автомобил. Лесно успеав да го престигнам Филипи за да се позиционирам зад лидерот Коронел. За жал, имав дефект на гумата откако избив на второто место и тоа веднаш се почувствува, поради што морав во бокс иако имав прекрасен ритам. Времињата по круг покажуваат дека сум возел речиси половина секунда побрзо од ривалите, што прави да ми биде потешко, бидејќи имав добра шанса за трофеј. Сега ќе се фоксусирам на трката во Спа и ќе се подготвувам за да бидам конкурентен на оваа патека. Сакам да се заблагодарам на тимот Comtoyou што ми даде неверојатен автомобил кој беше вистинско задоволство да го возиш на улиците во По.“ – додаде Давидовски.

Том Коронел останува лидер во генералниот пласман со 141 бод, пред Џон Филипи со 128. Давидовски со овие два пласмани се искачи на петтото место со 83 бода, бидејќи на претходната трка во Португалија беше елиминирал од Фелипе Фернандез кој го истурка од патеката додека беше третопласиран.

Третиот гран при викенд се вози на легендарната патека Спа Франкоршамп во Белгија, сместена во Арденските шуми, што е уште една локација која е позната по ноторно променливото време.

Извор: Media PSS Racing Team



Алфа и Омега на CARclub. Играчките остануваат, само стануваат поскапи.