Првиот целосно-електричен модел на Mercedes-Maybach е токму големиот EQS SUV, за кој од Mercedes-Benz кажуваат дека ќе го редефинира луксузниот SUV на иднината.
Новиот електричен супер-луксузен SUV на Mercedes-Maybach располага со 658 коњски сили и 950 Nm вртежен момент благодарение на надградениот електромотор – што пак му овозможува да забрза до 100 километри на час за само 4.4 секунди. Истовремено, благодарение на батеријата со капацитет од 107.8 kWh (која претпоставуваме дека е иста како кај „цивилните“ EQS модели) големиот луксузен EQS SUV би требало да може да помине до 600 километри.
Секако, како и кај секој Maybach, вистинскиот луксуз е во кабината. Таму, патниците ќе дишат парфимиран воздух благодарение на Air Balance пакетот кој е дел до стандардната опрема, ќе уживаат во врвен комфор на First Class седиштата и во прекрасниот звук од Burmester 4D аудио уредот со 15 звучници, ќе пијат пијалоци на контролирана температура, итн, итн.
Патниците на задните седишта добиваат и 11.6-инчни екрани преку кои можат да ја контролираат навигацијата, додека возачот го добива огромниот MBUX Hyperscreen. Секако, многу, многу внимание е посветено на рафинираноста и комфорот во возењето – и токму тука Mercedes-Maybach EQS SUV ќе ужива во вистинските благодети на електричниот погон. Ставете го селекторот за режим на возење во Maybach режим и сè станува помеко, покомфорно и попријатно.
Mercedes-Maybach EQS SUV ќе го препознаете по редизајнираната предна маска, двобојна каросерија, огромните 22-инчни тркала и други ситни Maybach детали.
Секако, со гордост можеме да кажеме дека дизајнот на опулентниот Mercedes-Maybach EQS SUV го потпишува токму македонскиот дизајнер Славче Таневски на кој на овогодинешните награди Златно Тркало му дадовме специјално признание за особен придонес кон промоција на Македонија во светската автомобилска индустрија. Секоја чест!
