Специјалната, Upland изведба на Compass и Renegade се добива само со врвниот 240-коњски 4xe плаг-ин хибриден погон кој нуди не само одлични перформанси, туку и врвна ефикасност.
Одличниот 4xe плаг-ин хибриден погон на Jeep комбинира 1.3-литарски турбо-бензинец со батериски модул со капацитет од 11.4 kWh и електромотор за вкупно 240 коњски сили. Бензинскиот мотор ги придвижува предните тркала, додека електромоторот е задолжен за задните тркала, а резултат на сето ова е супер-ефикасен и супер-прецизен погон на сите четири тркала кој овозможува лесно прилагодување на сите услови и на секаков терен.
Upland верзиите се базирани на Limited нивото на опрема, но добиваат и дополнителни светла за магла, LED предни светла, надграден UConnect панел за инструменти и 8.4-инчен дигитален дисплеј за Renegade односно 10.25-инчен дисплеј за Compass.
Дополнително, надградени се и теренските можности, па добиваат и седишта кои се лесни за чистење а кабините на двата теренци добиваат дополнителни декоративни детали. Интересно, и двата автомобили добиваат ексклузивни спортски седишта кои се наменети да ве држат во место при теренски авантури.
Секако, Renegade и Compass Upland добиваат и цела гама на системи за безбедност и сигурност, меѓу кои и Forward Collision Warning, Active Lane Management и Adaptive Cruise Control. Достапни се и неколку интересни бои – Alpine White, класична црна или Colorado Red кои се веќе достапни кај останатите изведби, додека Upland верзиите ги добиваат и ексклузивните Sting Gray и Shade Blue. Сите бои (освен црната) можат да се комбинираат со црн покрив за уште попривлечен изглед.
