Електричниот Ioniq 6 направи хет-трик – покрај наградата за Светски Автомобил на Годината, Ioniq 6 е прогласен и за Електричен Автомобил на Годината и Дизајн на Годината!
Hyundai навистина може да се гордее – електричниот Hyundai Ioniq 6 (кој ние неодамна го возевме на неговата европска промоција во Мадрид) освои три награди на овогодинешните Светски Автомобилски Награди. Жири од 100 автомобилски новинари од 32 земји го избраа Ioniq 6 за Светски Автомобил на Годината, но и за Електричен Автомобил на Годината и Дизајн на Годината. Интересно, ова е втор пат Hyundai да освои три награди – минатата година го постигна тоа со електричниот Ioniq 5.
„Почестени сме да ја примиме оваа престижна награда две години по ред. Ова е знак на препознавање на талентните и неуморните напори на сите во Hyundai за да го донесеме Ioniq 6 на пазарот“ – изјави Jaehoon Chang, претседателот и главен извршен директор на Hyundai Motor Company, и додаде – „Оваа чест ја потврдува нашата посветеност да бидеме глобален лидер во електрификација на возилата и ќе служи да ги охрабри нашите напори како провајдер на паметни решенија за мобилност.“
