Од следната година Ристо Вуков Рико ќе се натпреварува во ексклузивниот Porsche Mobil 1 Supercup!
„Соништата се остваруваат.“ – изјави Рико и со големо задоволство го објави неговиот следен – и ние би додале голем – чекор во кариерата, кој според него е олицетворение на сè она кое се подразбира под врвно натпреварување. Рико ќе се натпреварува на Porsche Mobil 1 Supercup – светски Porsche суперкуп кој се вози заедно со трките од Формула 1. Рико додава дека ќе му биде чест што ќе настапува под македонско знаме и ќе се натпреварува во најелитната конкуренција во светот.
Porsche Mobil 1 Supercup следната година ќе започне на 19-ти Мај на Имола во Италија. Потоа ќе се вози во Монако, Австрија, Обединетото Кралство, Унгарија, Белгија, Холандија и повторно во Италија. Суперкупот се вози на легендарни патеки – Имола, Силверстоун, Спа, Монца… На Рико му посакуваме многу, многу успех и му ветуваме многу поддршка во сезоната која доаѓа!
