Новиот Lamborghini Urus S го има истиот надграден твин-турбо V8 кој го има и Urus Performante, но кај оваа изведба приматот е даден на луксузот и рафинираноста.
Urus S е замена за „обичниот“ Urus – ги добива истите надградби кои ги доби и Urus Performante, но обвиени во пакет кој е ориентиран повеќе кон луксузот и рафинираноста. Моќниот, 4-литарски твин-турбо V8 испорачува 666 коњски сили и 850 Nm вртежен момент – доволни за катапултирање до 100 километри на час за 3.5 секунди и максимални 305 километри на час.
Ако во Urus гамата Performante е ориентиран кон возачите и максималната возбуда во возењето, тогаш Urus S е насочен кон врвен луксуз и софистицираност.
Urus S добива нови браници со нови декоративни елементи и дискретно редизајнирани завршетоци на издувниот систем, а добива и карбонски поклопец на моторот и карбонски кров, 22 или 23-инчни тркала, како и нови детали во кабината – Bi-Color Sportivo опција за ентериерот за оние кои сакаат подискретен ентериер, или пак Bi-Color Sophisticated за оние кои сакат повеќе персонализација, контрастни шевови и слично.
Критичарите на Urus можат и понатаму да го „хејтаат“ големиот супер-СУВ, но пред фактите и боговите молчат – Urus е брз, моќен и популарен!
