Т-моделите на Porsche преферираат врвно управување и забава зад воланот пред прекумерна сила – па најновиот Macan T ќе го понуди токму тоа!
Macan T го користи добро-познатиот 2-литарски четири-цилиндерски турбо-бензинец кој испорачува 265 коњски сили и 400 Nm вртежен момент. Сепак, она кое го издвојува Macan T од „обичниот“ Macan е преземањето компоненти од моќните Macan S и Macan GTS за да се добие врвно искуство зад управувачот.
Системот за контрола на тракцијата е рекалибриран, а повеќе сила се испорачува кон задните тркала. Дополнително, тука е и Sport Chrono пакетот со Sport Response копче на управувачот. Според Porsche, Macan T забрзува до 100 километри на час за само 5.8 секунди и постигнува максимални 232 километри на час.
Macan T го добива и напредниот Porsche Active Suspension Management (PASM) систем, како и поцврсти анти-рол прегради и Porsche Torque Vectoring Plus софтвер. Визуелно, Macan T е препознатлив по 20-инчните тркала, надворешни детали во Agate Grey Metallic, спортски завршетоци на издувниот систем, како и декоративни елементи во црна боја. Внатрешноста добива засебни материјали и Sport-Tex детали како и сребрени шевови.
Согласно досегашните практики, очекуваме дека Macan T ќе чини малку повеќе од основниот Macan, но динамичноста ќе биде на сосем поинакво ниво. Нарачките ќе бидат отворени наскоро.
